ڪراچي(ويب ڊيسڪ) ايئر ڪراچي جي چيئرمين ۽ مشهور بزنس مين حنيف گوهر انڪشاف ڪيو آهي ته تربيلا ڊيم جي مٽيءَ ۾ 636 ارب ڊالر ماليت جا سون جا ذخيرا موجود آهن. هن ٻڌايو ته ان بابت وزيراعظم ۽ آرمي چيف کي بريفنگ ڏني وئي آهي، ۽ آرمي چيف طرفان فوري طور تي مثبت جواب مليو.
ڪراچي پريس ڪلب ۾ ميڊيا سان ڳالهائيندي حنيف گوهر ٻڌايو ته تربيلا ڊيم جي مٽيءَ ۾ سون جي موجودگي جي تصديق لاءِ غوطا خورن ذريعي مٽيءَ جا نمونا حاصل ڪيا ويا. اهي نمونا ليبارٽري ۾ تجزيو ڪيا ويا، جنهن مان سون جي آزمائشي جي شرح معلوم ڪئي وئي. بعد ۾ ان شرح کي سون واري علائقي جي ڪعبي فٽ مٽي سان ضرب ڏني وئي، جنهن مان نتيجو نڪتو ته تقريباً 636 ارب ڊالر جو سون موجود آهي.
حنيف گوهر چيو ته تربيلا ڊيم کي ٺهيل 60 سال گذري چڪا آهن، پر اڃا تائين ان جي مٽي نه ڪڍي وئي آهي، جيڪا هاڻ انتهائي ضروري ٿي چڪي آهي. هن ٻڌايو ته آرمي چيف کي سڄو معاملو پيش ڪيو، جن ايس آءِ ايف سي جي سربراهه جنرل سرفراز کي ذميواري ڏني. بعد ۾ حنيف گوهر جنرل سرفراز کي جي ايڇ ڪيو ۾ بريفنگ ڏني، جنهن کان پوءِ معاملو واپڊا جي ان وقت جي چيئرمين سجاد غني حوالي ڪيو ويو.
گوهر ٻڌايو ته سجاد غني سان ڳالهه ٻولهه دوران هن تجويز ڏني ته واپڊا پاڻ هي منصوبو مڪمل ڪري، پر جيڪڏهن ائين نه ٿئي ته هن جي ڪمپني پاڻ سيڙپڪاري ڪندي، سون ڪڍي حڪومت حوالي ڪندي. هن چيو ته هاڻ حڪومت جي جواب جو انتظار آهي.
هن وڌيڪ چيو ته جيڪڏهن واپڊا هي منصوبو پاڻ ڪري ته ٺيڪ، نه ته هن جي ٽيم مڪمل تيار آهي. “مان هالينڊ ۾ ان بابت ڳالهه ڪري آيو آهيان، جتي دنيا جا وڏا ڊريجنگ جا منصوبا ٿين ٿا. ايمسٽرڊيم ۽ ڪينيڊا ۾ اسان جا پارٽنر موجود آهن، جن سان ملاقاتون به ٿي چڪيون آهن.” هن چيو ته جيڪڏهن حڪومت اجازت ڏئي ته اسان فوري طور تي منصوبو شروع ڪرڻ لاءِ تيار آهيون، ۽ تربیلا جو سون ملڪ جو قرض لاهي سگهي ٿو.
ان کان علاوه، حنيف گوهر اعلان ڪيو ته ايئر ڪراچي جو ڊوميسٽڪ آپريشن 23 مارچ کان شروع ڪيو ويندو، جنهن لاءِ گهٽ ۾ گهٽ ٽي ۽ وڌ ۾ وڌ پنج ايئربس جهاز موجود هوندا. هي آپريشن هڪ سال تائين جاري رهندو، جنهن کان پوءِ انٽرنيشنل آپريشن شروع ڪيو ويندو.
هن اهو به ٻڌايو ته حيدرآباد ۾ پهريون فور اسٽار هوٽل تعمير ڪيو پيو وڃي، جيڪو پنج ايڪڙ زمين تي مشتمل هوندو. گوهر زور ڏنو ته ملڪ جي بجيٽ خساري کي ختم ڪرڻ لاءِ تعميراتي صنعت جي ترقي ضروري آهي. هن افسوس جو اظهار ڪيو ته ڪراچي جو نظام هاڻ فرنٽ فٽ تي نه، پر بئڪ فٽ تي ڪم ڪري رهيو آهي.
حنيف گوهر جا هي انڪشاف ۽ منصوبا ملڪ جي معيشت، توانائي، هوابازي ۽ سياحت جي شعبن لاءِ نئين اميد بڻجي سگهن ٿا، بشرطيڪه حڪومت انهن کي عملي جامو پارائڻ جي اجازت ڏئي.
