اسلام آباد (ويب ڊيسڪ) وزيراعظم جي سياسي معاملن بابت مشير رانا ثناءالله چيو آهي ته آئين هر ملڪ لاءِ مقدس دستاويز هوندو آهي، پر اهو حرف آخر نه هوندو، وقت سان گڏ حالتون بدلجن ٿيون ۽ بهترين لاءِ آئيني سڌارا ناگزير هوندا آهن.
هن ٻڌايو ته پاڪستان جي آئين ۾ اڄ تائين 26 ترميمون ٿي چڪيون آهن، جڏهن به پارليامينٽ جي ٻٽي اڪثريت ڪنهن معاملي تي متفق ٿئي ته ترميم ممڪن آهي. سياسي عمل هميشه جاري رهندو آهي ۽ مختلف معاملن تي بحث مباحثو جهموريت جو حصو آهي.
رانا ثناءالله واضح ڪيو ته اهڙو ناهي جو صبح ئي 27هين ترميم آندي پئي وڃي، پر مختلف معاملن تي پارليامينٽرينز ۽ سياسي پارٽين وچ ۾ مشاورت جاري آهي. مسلم ليگ (ن) کي 18هين ترميم سان ڪو اختلاف ناهي، ڇو ته اها ترميم سڀني سياسي پارٽين جي اتفاق راءِ سان منظور ڪئي وئي هئي.
هن وڌيڪ چيو ته 18هين ترميم وسيلن جي ورهاست سان لاڳاپيل آهي، هاڻي ضرورت آهي ته وفاق ۽ صوبن جي وچ ۾ توازن پيدا ڪيو وڃي. دفاعي بجيٽ صرف وفاق جي نه پر صوبن جي به گڏيل ذميواري آهي، ڇو ته دفاع ۽ قرضن جي ادائيگي کان پوءِ وفاق وٽ محدود وسيلا بچن ٿا.
