اسلام آباد (ويب ڊيسڪ) اسلام آباد هاءِ ڪورٽ تعليمي ادارن مان منشيـات جي خاتمي بابت ڪيس جي ٻڌڻي دوران پاڪستان اليڪٽرانڪ ميڊيا ريگيوليٽري اٿارٽي (پيمرا) کي هدايت ڪئي آهي ته منشيـات جي خلاف آگـاهي مهم پرائم ٽائيم تي نشر ڪئي وڃي.
جسٽس راجه انعام امين منهاس واضح ڪيو ته رات جو هڪ وڳي مهم هلائڻ جو ڪو فائدو ناهي، اها مهم ماڻهن جي توجهه وقت يعني پرائم ٽائيم تي هلڻ گهرجي. عدالت آءِ جي اسلام آباد، اينٽي نارڪوٽڪس فورس (اين ايف)، پرائيويٽ اسڪول ريگيوليٽري باڊي ۽ ٻين اسٽيڪ هولڊرز کي گڏجي منشيـات جي خاتمي لاءِ مؤثر نظام جوڙڻ جي هدايت پڻ ڏني.
پرائيويٽ تعليمي ادارن جي ريگيوليٽري اٿارٽي (پيرا) عدالت ۾ رپورٽ پيش ڪندي ٻڌايو ته جيڪڏهن ڪنهن به تعليمي اداري مان شاگرد، اسٽاف يا ڪنٽين اسٽاف وٽان منشيـات ملي ته اداري جي سربراهه خلاف ڪارروائي ڪئي ويندي. رپورٽ موجب، تعليمي ادارن ۾ ڊليوري بوائز ۽ ڪوريئر سروسز جي داخلا تي مڪمل پابندي لاڳو ڪئي وئي آهي.
عدالت ۾ پيش ڪيل رپورٽ موجب، 2025 دوران اسلام آباد جي تعليمي ادارن مان منشيـات بابت اين ايف طرفان 51 ڪيس داخل ڪيا ويا، جڏهن ته پوليس طرفان 22 ڪيس درج ڪيا ويا. درخواست گذار وڪيل ڪاشف علي ملڪ عدالت ۾ پيش ٿيو.
عدالت آءِ جي اسلام آباد کي هدايت ڪئي ته سڀني لاڳاپيل ڌرين سان مشاورت ڪري منشيـات جي خاتمي لاءِ جامع حڪمت عملي تيار ڪئي وڃي. ڪيس جي ٻڌڻي ٻن هفتن لاءِ ملتوي ڪئي وئي.
