قلات (ويب ڊيسڪ) بلوچستان جي ضلعي قلات ۾ سيڪيورٽي فورسز هڪ اهم انٽيليجنس بنياد تي آپريشن دوران ڀارتي سرپرستي هيٺ هلندڙ تنظيم “فتنته الهندستان” سان واسطو رکندڙ 4 دهشتگردن کي ماري ڇڏيو. آءِ ايس پي آر موجب، هي آپريشن 1 نومبر جي رات دهشتگردن جي موجودگي جي اطلاع تي عمل ڪندي ڪيو ويو.
سيڪيورٽي فورسز دهشتگردن جي ٺڪاڻن کي مؤثر طريقي سان نشانو بڻايو، جنهن جي نتيجي ۾ تنظيم جا 4 سرگرم دهشتگرد مارجي ويا، جيڪي مختلف تخريبي ۽ دهشتگردانه ڪاررواين ۾ ملوث هئا. آپريشن دوران هٿيار ۽ بارودي مواد به هٿ آيو.
آءِ ايس پي آر موجب، علائقي ۾ ڪليئرنس آپريشن جاري آهي ته جيئن ڪنهن به بچيل دهشتگرد کي ڳولي ختم ڪيو وڃي. سيڪيورٽي فورسز ۽ قانون لاڳو ڪندڙ ادارا “عزمِ استحڪام” جي ويزن تحت دهشتگردي خلاف مهم پوري قوت سان جاري رکي رهيا آهن، جيڪا ملڪ مان غير ملڪي سرپرستي هيٺ دهشتگردي جي مڪمل خاتمي تائين جاري رهندي.
ملڪي قيادت پاران سيڪيورٽي فورسز کي خراج تحسين
صدرِ آصف علي زرداري قلات ۾ ڪامياب آپريشن تي سيڪيورٽي فورسز کي خراج تحسين پيش ڪندي چيو ته ڀارتي سرپرستي هيٺ دهشتگردن جو خاتمو قومي سلامتي لاءِ اهم ڪاميابي آهي. هن چيو ته قوم سيڪيورٽي فورسز سان گڏ بيٺل آهي ۽ دهشتگردي جي ناسور جي خاتمي لاءِ پرعزم آهي.
وزيراعظم شهباز شريف به آپريشن تي فورسز جي پيشه ورانه صلاحيتن جي واکاڻ ڪندي چيو ته ملڪ مان دهشتگردي جي مڪمل خاتمي تائين جنگ جاري رهندي. هن چيو ته وطن جي حفاظت لاءِ سڄي قوم پاڪ فوج سان ڪلهو ڪلهي سان بيٺل آهي.
وفاقي گهرو وزير محسن نقوي به آپريشن تي سيڪيورٽي فورسز کي سلام پيش ڪندي چيو ته فورسز بروقت ڪارروائي ڪندي ڀارتي اسپانسرڊ دهشتگردن جي ناپاڪ ارادن کي ناڪام بڻايو. هن چيو ته فتنته الهندستان جو عبرتناڪ انجام واضح پيغام آهي ته پاڪستان ۾ اهڙن عنصرن لاءِ ڪا جاءِ نه آهي.
