اسلام آباد (ويب ڊيسڪ) اسلام آباد مان حاصل ٿيل معلومات موجب، فيڊرل بورڊ آف ريونيو (ايف بي آر) فردي ٽيڪس ڏيندڙن لاءِ آن لائن انڪم ٽيڪس ريٽرن ۽ ود هولڊنگ اسٽيٽمينٽ جمع ڪرائڻ لازمي قرار ڏيڻ جو فيصلو ڪيو آهي، جنهن لاءِ انڪم ٽيڪس رولز 2002 ۾ ترميمون تجويز ڪيون ويون آهن.
ايف بي آر پاران تيار ڪيل ترميمي مسودو اسٽيڪ هولڊرن جي راءِ لاءِ جاري ڪيو ويو آهي، جيڪو انڪم ٽيڪس آرڊيننس 2001 جي سيڪشن 237 جي تحت حاصل اختيارن جي بنياد تي تيار ڪيو ويو آهي.
نوٽيفڪيشن ۾ ڄاڻايو ويو آهي ته جن فردن تي هي ترميمون اثرانداز ٿي سگهن ٿيون، اهي سرڪاري گزٽ ۾ اشاعت کان 7 ڏينهن اندر پنهنجا اعتراض يا تجويزون ايف بي آر کي موڪلي سگهن ٿا. موصول ٿيل راءِ کي حتمي فيصلو ڪرڻ کان اڳ غور هيٺ آندو ويندو.
ترميمي مسودي موجب، انڪم ٽيڪس رولز جي رول 73 ۾ موجود ذيلي قاعدي 2ڊي ڊي کي تبديل ڪري نئون قاعدو شامل ڪرڻ جي تجويز ڏني وئي آهي، جنهن تحت انفرادي ٽيڪس ڏيندڙن لاءِ اليڪٽرانڪ فائلنگ (آن لائن جمع ڪرائڻ) لازمي قرار ڏنو ويو آهي.
ايف بي آر جو چوڻ آهي ته هن ترميم جو مقصد ٽيڪس نظام ۾ جديد ٽيڪنالاجي جو استعمال وڌائڻ، ريٽرن جمع ڪرائڻ جو عمل آسان بڻائڻ ۽ ٽيڪس ڏيندڙن جي ڊيٽا کي مؤثر طريقي سان منظم ڪرڻ آهي.
