اسلام آباد(ويب ڊيسڪ) پاڪستان جي نوجوان جوجٽسو ائٿليٽ اسرا وسيم کي جوجٽسو ائٿليٽس ڪميشن جي ميمبر طور چونڊي وئي آهي، جيڪو عالمي سطح تي جوجٽسو رانديگرن جي مفادن جي نمائندگي لاءِ اهم ڪردار ادا ڪري ٿو۔
ڪميشن جي چونڊيل ٻن ميمبرن کي جي جي آءِ ايف بورڊ ۾ ووٽ ڏيڻ جو مڪمل حق حاصل آهي، جنهن سان رانديگرن جي آواز کي سڌي ريت پاليسي سازي ۽ فيصلا سازي جي عمل ۾ شامل ڪيو ويندو آهي۔
هن ڀيري چونڊيل ميمبرن جو تعلق پاڪستان، يوڪرين، آسٽريا، ايران، آمريڪا ۽ ميڪسيڪو سان آهي۔ ووٽنگ جو عمل ٿائيلينڊ جي راڄڌاني بينڪاڪ ۾ مڪمل ٿيو، جنهن ۾ اهي سڀئي بين الاقوامي رانديگر حصو وٺڻ جا اهل هئا، جن گذريل چار سالن دوران JJIF جي منظور ٿيل مقابلن ۾ شرڪت ڪئي هئي۔
چونڊ کانپوءِ ٿيل اجلاس ۾ اسرا وسيم (پاڪستان) ۽ ڊميٽرو ٽرون (يوڪرين) کي سادي اڪثريت سان ائٿليٽ ڪميشن جا نمائنده اسپيڪر پڻ چونڊيو ويو۔
جوجٽسو فيڊريشن جي عملدارن موجب، هي چونڊ پاڪستان لاءِ فخر جو لمحو آهي، ڇو ته عالمي سطح تي پاڪستاني رانديگر تي اعتماد جو اظهار ڪيو ويو آهي، جيڪو ملڪ جي راندين جي ترقي لاءِ هڪ اهم اڳڀرائي آهي۔
