ڪراچي (ويب ڊيسڪ) وفاقي وزير مصدق ملڪ چيو آهي ته ملڪ جي واڌاري لاءِ وڏيرڪي ۽ اشرافيه جي اجاراداري کي ٽوڙڻ انتهائي ضروري آهي. هو فيوچر سمٽ ۾ خطاب ڪري رهيو هو.
مصدق ملڪ چيو ته منزل جي سڃاڻپ کانسواءِ واٽ جو تعين ممڪن ناهي. نوجوانن جون اميدون ساديون آهن، هو تبديلي تي پڪو ويساهه رکن ٿا. هن چيو ته عام ماڻهو کي جي ڊي پي، پرڏيهي کاتو يا مالي انگن اکرن جي ڄاڻ ناهي، هو ته رڳو پنهنجي روزاني زندگي بهتر بنائڻ چاهين ٿا.
هن چيو ته ڪراچي وارا شايد لاهور جي ڌنڌ (اسموگ) جو اندازو نه ڪري سگهن، جيڪا انسان جي عمر مان 7 کان 8 سال گهٽائي ٿي. هن پنهنجي والد جي آخري ڏينهن جو ذڪر ڪندي چيو ته سندس خواهش هئي ته هو ڪجهه گهڙين لاءِ هوش ۾ اچي، ته جيئن هو دل جي ڳالهه ڪري سگهي.
وفاقي وزير زور ڏنو ته عام ماڻهن کي بنيادي علاج جون سهولتون ڏيڻ ڪا ڏکي ڳالهه ناهي. پاڙا تڏهن ئي آباد ٿيندا، جڏهن مڪاني نمائندا چونڊجي سامهون اچن ۽ لوڪل ادارا مضبوط ٿين.
مصدق ملڪ چيو ته سرڪاري نوڪريون محدود آهن، سٺيون نوڪريون تڏهن ملنديون، جڏهن نجي شعبي کي واڌارو ملي. واپار جي واڌاري سان ئي پائيدار ترقي ممڪن آهي، جيڪا پيداوار ۽ نواڻ سان جُڙيل آهي. نواڻ تڏهن ايندي، جڏهن مقابلو ٿيندو، ۽ مقابلي لاءِ سڀني کي برابر موقعا ملڻ گهرجن.
هن چيو ته جيڪڏهن صرف مخصوص طبقا ئي وسيلن تي قابض هجن، ته باقي شعبي ڪيئن ترقي ڪندا؟ جيڪڏهن بجلي، گئس، يا رعايتون رڳو چند ماڻهن کي ملن، ته مقابلو ختم ٿي ويندو. اهڙي صورتحال ۾ اشرافيه ئي غالب رهندي.
مصدق ملڪ خبردار ڪيو ته جيڪڏهن اشرافيه جي اجاراداري ختم نه ڪئي وئي، ته ملڪ جي معيشت ڪڏهن به مضبوطي سان اڳتي نه وڌي سگهندي.
