ڪراچي (اسٽاف رپورٽر) سنڌ جي سينيئر صوبائي وزير شرجيل انعام ميمن چيو آهي ته منهنجي خواهش آهي ته ماڻهو قانون جي پيروي ڪن ۽ حڪومت کي چالان جي مد ۾ هڪ رپيو به نه ملي.
پريس ڪانفرنس دوران صوبائي وزير ٽرانسپورٽ ۽ اطلاعات شرجيل ميمن چيو ته سنڌ حڪومت خوراک جي کوٽ کان بچڻ لاءِ ڪوششون ڪري رهي آهي. بلاول ڀٽو زرداري جي هدايت تي سنڌ حڪومت هارين جي مدد شروع ڪري ڇڏي آهي، ۽ اڄ کان سنڌ جي هر علائقي ۾ هارين کي سهائتا فراهم ڪئي پئي وڃي.
هن ٻڌايو ته 4 لک 19 هزار هارين کي في ايڪڙ 14 هزار رپيا ڏنا ويندا، جيڪي خاص طور تي ڪڻڪ جي پوک لاءِ آهن. وفاقي حڪومت کي هن سال به ڪڻڪ امپورٽ ڪرڻي پئي. غربت جي لڪير هيٺ زندگي گذارڻ وارن کي “هاري ڪارڊ” ذريعي مدد ڏني پئي وڃي.
شرجيل ميمن چيو ته اي چالان تي ڪجهه سياسي پارٽيون سياست ڪري رهيون آهن، جيڪي نه پاڻ ڪم ڪرڻ چاهين ٿيون ۽ نه ٻين کي ڪرڻ ڏين ٿيون. هن چيو ته اي چالانز کانپوءِ ٽريفڪ جي رواني ۾ واضح سڌارو آيو آهي. منهنجي خواهش آهي ته ماڻهو قانون جي پاسداري ڪن ته جيئن حڪومت کي چالان جي مد ۾ هڪ رپيو به نه ملي. حڪومت جو مقصد چالان ذريعي پئسا ڪمائڻ نه آهي. هڪ هفتي ۾ 20 هزار کان وڌيڪ چالان ٿيا آهن، جن مان ڪيترائي معاف ڪرايا ويا. ريڊ لائيٽ ۽ ون وي جي ڀڃڪڙي خطرناڪ آهي. ٽريفڪ جا قانون ماڻهن جي حفاظت لاءِ آهن.
هن چيو ته عدالت ۾ به پنهنجو موقف پيش ڪيو آهي. ڪراچي جا ڪجهه چئلينج آهن، جن تي تنقيد ڪئي پئي وڃي. مارچ تائين ڪراچي جي انفرااسٽرڪچر ۾ واضح سڌارو نظر ايندو. شاهراهه ڀٽو ڪراچي جو شاندار منصوبي آهي، جڏهن ته ريڊ لائن ۽ لنڪ روڊز تي به ڪم جاري آهي. سنڌ حڪومت جو واعدو آهي ته ماڻهن جون اميدون جلد پوريون ٿينديون.
شرجيل ميمن چيو ته پيپلز پارٽي جي قيادت هر فيصلو مشاورت سان ڪري ٿي. پيپلز پارٽي هڪ جمهوري جماعت آهي. 27هين آئيني ترميم بابت سي اي سي جو اجلاس گهرايو ويو آهي، جنهن ۾ فيصلو سامهون ايندو. پاڪستان جي آئيني ضرورتن کي ڏسندي ترميمون ٿينديون آهن. 18هين ترميم به پيپلز پارٽي جي دور ۾ آئي. 27هين ترميم تي تفصيلي ڳالهه ٻولهه ٿيندي. آئيني ترميمن جو مقصد غلط بڻايو ويو آهي. وقت جو انتظار ڪيو وڃي. پيپلز پارٽي پاڪستان جي حق ۾ بهتر فيصلو ڪندي. آزاد ڪشمير جي تحريڪ هلي رهي آهي، جنهن جو وقت مقرر ڪيو ويندو ۽ اهو معاملو به سي اي سي ۾ آندو ويندو.
