دوحه (ويب ڊيسڪ) صدر آصف علي زرداري چيو آهي ته قطر خطي ۾ امن لاءِ هڪ اهم ثالث طور ڪم ڪيو آهي، جنهن جي سهولتڪاري سان افغان امن عمل جي راهه هموار ٿي. هن ڳالهه جو اظهار قطر جي اخبار “دي پيننسولا” کي ڏنل هڪ خاص انٽرويو دوران ڪيو.
صدر زرداري قطر جي تعميري ڪردار جي واکاڻ ڪندي چيو ته پاڪستان ۽ قطر جي ڀائيواري نه رڳو علائقائي امن، پر توانائي جي تحفظ ۽ سماجي ترقي لاءِ به اسٽريٽجڪ اهميت رکي ٿي. هن زور ڏنو ته پاڪستان ۽ خليجي ملڪ افرادي قوت، مهارت جي واڌاري ۽ پائيدار سيڙپڪاري ۾ گڏجي ڪم ڪري سگهن ٿا.
هن واضح ڪيو ته قطر نه رڳو حماس ۽ عالمي ڌرين جي وچ ۾ ڳالهين جي سهولت فراهم ڪئي، پر آمريڪا ۽ طالبان جي وچ ۾ به اهم ڳالھين جي ميزباني ڪئي، جنهن سان پاڪستان جي علائقائي خدشن بابت به اهم اڳڀرائي ٿي.
صدر زرداري چيو ته دوحه عالمي عمل جو مقصد علائقائي ۽ عالمي سطح تي اشتراڪ پيدا ڪرڻ آهي. پاڪستان غربت، تعليم ۽ صحت جي مسئلن کي سماجي تحفظ ۽ انساني وسيلي ۾ سيڙپڪاري ذريعي حل ڪرڻ جي ڪوشش ڪري رهيو آهي. موسمياتي تبديلي روزگار ۽ زندگي تي سڌو اثر وجهي ٿي، ۽ دوحه اعلاميي ۾ سماجي تحفظ ۽ موسمي تبديلين کي تسليم ڪيو ويو آهي.
هن ٻڌايو ته بينظير انڪم سپورٽ پروگرام تحت 90 لک کان وڌيڪ خاندانن کي سڌي مالي مدد ملي رهي آهي، جڏهن ته “وسيلو تعليم” ۽ “نشوونما” جهڙا پروگرام ٻارن جي تعليم ۽ غذائي معيار کي بهتر بڻائي رهيا آهن. پاڪستان جي سماجي پاليسي دوحه اعلاميي جي اصولن سان هم آهنگ آهي، جتي عالمي سماجي تحفظ ۽ جامع معاشي بحالي تي زور ڏنو ويو آهي.
صدر زرداري چيو ته سيلاب متاثرين لاءِ نقد امداد بحالي جي عمل کي تيز ڪيو، جڏهن ته بي آءِ ايس پي جا ڊجيٽل والٽس عورتن جي مالي خودمختياري وڌائي رهيا آهن. هن عزم ظاهر ڪيو ته اسان اهڙو پاڪستان چاهيون ٿا، جتي عورتون بااختيار ۽ نوجوان باعزت روزگار حاصل ڪن.
