اسلام آباد (ويب ڊيسڪ) جمعيت علماءِ اسلام (ف) جي سربراهه مولانا فضل الرحمان چيو آهي ته 26هين آئيني ترميم تي اسحاق ڊار چوندو هو ته اها هضم نٿي ٿئي، هاڻي 27هين ترميم ڪٿي ٻئي هنڌان آندي پئي وڃي.
اهو اظهار هن پاڪستان تحريڪ انصاف جي وفد سان ملاقات کان پوءِ ميڊيا سان ڳالهائيندي ڪيو. مولانا فضل الرحمان چيو ته سندن وزيراعظم، آرمي چيف يا بيوروڪريسي سان ڪا ويڙهه ناهي، پر ملڪ ۾ تلخ ماحول کي گهٽائڻ چاهين ٿا.
هن ديني مدرسن بابت پاليسين تي سوال اٿاريندي چيو ته فيض حميد، باجوه ۽ موجوده حڪومتي پاليسين ۾ فرق ڇو ناهي؟ مسلم ليگ (ن) جي طرفان علما جي توهين ڪئي پئي وڃي، امامن کي 12 هزار رپيا ڏنا پيا وڃن، جيڪو توهين آهي. ڪي پي ڪي ۾ به امامن کي 10 هزار رپيا ڏنا پيا وڃن، مسجدن کي ڪنٽرول ڪرڻ لاءِ رقمون ورهائيون پيون وڃن.
مولانا چيو ته آئين کي مذاق نه بڻايو وڃي، هڪ سال ۾ ٻي ترميم آڻڻ جو مطلب آهي ته جبر تحت تبديليون ٿي رهيون آهن، جنهن سان عوام جو سياستدانن ۽ آئين تي اعتماد ختم ٿي سگهي ٿو.
هن دعويٰ ڪئي ته 26هين ترميم دوران حڪومت کي 34 شقن تان هٿ کڻائڻ تي مجبور ڪيو، هاڻي ساڳي ريت 27هين ترميم جي تياري ٿي رهي آهي، جنهن جو مسودو اڃا تائين اپوزيشن کي نه مليو آهي.
فضل الرحمان چيو ته هڪ وفاقي وزير گذريل ٽن مهينن کان 27هين ترميم تي ڪم ڪري رهيو آهي، جنهن مان ظاهر ٿئي ٿو ته اها ترميم ٻئي هنڌان تيار ٿي آهي.
افغانستان بابت ڳالهائيندي هن چيو ته جيڪڏهن اتي مرڪزن تي حملا جائز آهن ته پوءِ ڀارت طرفان مريدڪي ۽ بهاولپور تي حملن کي به جواز ملي سگهي ٿو. افغان حڪومت سان مسئلو آهي، پر سزا افغان مهاجرن کي ڏني پئي وڃي.
هن زور ڏنو ته پاڪستان کي پرو-افغانستان هجڻ گهرجي، جيئن جنگ کان پوءِ به ڳالهه ٻولهه ڪئي وئي هئي. هن چيو ته پاڪستان ۾ دهشتگردي آهي ته اهو اسان جو اندريون مسئلو آهي.
