اسلام آباد(ويب ڊيسڪ) پارليماني معاملن واري وفاقي وزير طارق فضل چوڌري چيو آهي ته 27هين آئيني ترميم جو مسودو اڄ سينيٽ ۾ پيش ڪيو ويندو، جنهن بابت اتحادي جماعتن تعاون جي خاطري ڪرائي آهي، جڏهن ته پيپلز پارٽي کي ڪجهه خدشا آهن۔
مرڪزي وزير موجب، ترميمي مسودي ۾ 18هين ترميم کي رول بيڪ ڪرڻ جي ڪا تجويز شامل ناهي، ۽ اميد آهي ته سينيٽ کان پوءِ قومي اسيمبلي مان به ترميم منظور ٿي ويندي۔
هن ٻڌايو ته اين ايف سي ۽ ٻين معاملن تي باهمي مشاورت سان اتفاق راءِ پيدا ڪيو ويندو، ۽ صرف 2–3 شقن تي اختلاف موجود آهن۔
وزيراعظم شهباز شريف اتحادي جماعتن جي اڳواڻن سان ملاقات ڪئي، جنهن ۾ ايم ڪيو ايم، نيشنل پارٽي ۽ ٻين جماعتن مڪمل اعتماد جو اظهار ڪيو، جڏهن ته پيپلز پارٽي سان به مثبت مشاورت ٿي آهي۔
طارق فضل چوڌري جو چوڻ هو ته مولانا فضل الرحمان کي به آن بورڊ آڻڻ جي ڪوشش ڪئي پئي وڃي، جيئن اڳ 26هين ترميم ۾ سندن حمايت حاصل هئي، اميد آهي ته هن ڀيري به ساٿ ڏيندا۔
