اسلام آباد (ويب ڊيسڪ) سني اتحاد ڪونسل جي چيئرمين ۽ قومي اسيمبلي جي ميمبر صاحبزادہ حامد رضا کي اسلام آباد پوليس پشاور کان فيصل آباد ويندي رستي ۾ گرفتار ڪري ورتو، جنهن بعد کيس فيصل آباد سينٽرل جيل منتقل ڪيو ويو آهي.
پي ٽي آءِ جي مرڪزي سيڪريٽري اطلاعات شيخ وقاص اڪرم موجب، صاحبزادہ حامد رضا جي گرفتاري اسلام آباد پوليس طرفان عمل ۾ آئي. سني اتحاد ڪونسل جي وقتي چيئرمين صاحبزادہ حسن رضا به گرفتاري جي تصديق ڪري ڇڏي آهي، جڏهن ته اسلام آباد پوليس طرفان اڃا تائين سرڪاري طور تي گرفتاري جي تصديق ناهي ڪئي وئي.
ذريعن جو چوڻ آهي ته صاحبزادہ کي فيصل آباد پوليس حوالي ڪيو ويو آهي. ياد رهي ته حساس ادارن تي حملي جي ڪيسن ۾ مقامي عدالت کيس 40 سال قيد جي سزا ٻڌائي چڪي آهي، جنهن سبب پوليس کيس گرفتار ڪرڻ جي ڪوشش ڪري رهي هئي.
واضح رهي ته صاحبزادہ حامد رضا سيپٽمبر ۾ تحريڪ تحفظ آئين پاڪستان جي سيڪريٽري انفارميشن جي عهدو تان استعيفيٰ ڏئي چڪو آهي. ان سان گڏ، گذريل ڏينهن انسداد دهشتگردي عدالت 26 نومبر ڪيس ۾ خيبر پختونخوا جي وزيراعليٰ سهيل آفريدي ۽ پي ٽي آءِ جي صوبائي صدر جنيد اڪبر جي گرفتاري جا وارنٽ جاري ڪيا هئا، پر پوليس جي اسلام آباد ۾ خيبر پختونخوا هائوس اچڻ باوجود وزيراعليٰ موجود نه هو.
