اسلام آباد (ويب ڊيسڪ) سپريم ڪورٽ جي آئيني بينچ ۾ سول سروس رولز بابت ڪيس جي ٻڌڻي دوران تجويز ڪيل 27هين آئيني ترميم تي ججن ۽ وڪيلن وچ ۾ دلچسپ ۽ طنزيه انداز ۾ مڪالمو ٿيو، جيڪو عدالت جي ماحول کي سنجيدگي سان گڏ هلڪو خوشگوار بڻائي ويو.
جسٽس امين الدين خان جي سربراهيءَ ۾ ٻڌڻي دوران، وڪيل فيصل صديقي چيو ته کيس اميد ناهي ته ڪيس اڄ ختم ٿيندو. هن بنا نالي وٺڻ جي 27هين آئيني ترميم جو ذڪر ڪندي چيو ته، “بلڊنگ وٺڻي هئي ته وفاقي شرعي عدالت جي ڇو؟ ڀر واري عمارت وٺي وٺن ها!” جنهن تي ججن مسڪرايا.
جسٽس جمال مندوخيل طنزيه انداز ۾ ريمارڪس ڏنا ته “رات اوهان جي حق ۾ ڪجهه پيش رفت ٿي آهي”، جنهن تي فيصل صديقي جواب ڏنو، “مون کي ڪو شڪ ناهي ته سپريم ڪورٽ جو ڪو ڪجهه بگاڙي نٿو سگهي.” جسٽس مندوخيل چيو، “جيڪڏهن اهو ايمان آهي ته پوءِ فڪر جي ڪهڙي ڳالهه!”
جسٽس امين الدين خان واضح ڪيو ته “اسين آئين جا پابند آهيون.” فيصل صديقي چيو ته “اوهان ججن هن ڪورٽ روم ۾ تمام گرينڊ لڳو ٿا.” جسٽس مندوخيل وري چيو ته “عمارت جي تبديلي سان اختيار گهٽ نٿا ٿين.”
واضح رهي ته ٻڌڻي سول سروس رولز سان لاڳاپيل ڪيس تي ٿي رهي هئي، پر تجويز ڪيل آئيني ترميم جي پس منظر سبب عدالت ۾ سياسي ۽ آئيني حوالن سان دلچسپ تبصرا سامهون آيا.
