اسلام آباد (بيورو رپورٽ) – وفاقي ڪابينا 27هين آئيني ترميم جي منظوري ڏئي ڇڏي، جنهن تحت پاڪستان جي دفاعي ڍانچي ۾ هڪ نئين فوجي شاخ “آرمي راڪٽ فورس” (ARFC) جو قيام عمل ۾ آندو ويندو. وزيراعظم شهباز شريف جي صدارت هيٺ ڪابينا جو اجلاس ٿيو، جنهن ۾ وزير قانون اعظم نذير تارڙ 27هين ترميم بابت تفصيلي بريفنگ ڏني.
وزيراعظم آذربائيجان جي شهر باڪو مان وڊيو لنڪ ذريعي اجلاس جي صدارت ڪئي.
اجلاس ۾ خواجه آصف، بلال اظهر کياني، رانا تنوير، رانا مبشر، عون چوڌري، ڊاڪٽر شهزره منصب، رياض حسين پيرزادو، قيصر احمد شيخ ۽ ملڪ رشيد احمد شرڪت ڪئي. اٽارني جنرل منصور عثمان اعوان به اجلاس ۾ موجود هو ۽ قانوني نقطن تي بريفنگ ڏني. اجلاس دوران پيپلز پارٽي جي تجويزن جو به جائزو ورتو ويو.
ذريعن موجب، اجلاس ۾ ٽن اهم ترميمن جي منظوري ڏني وئي، جن ۾ آئيني ڪورٽ جو قيام، ججن جي بدلي بابت ايگزيڪٽو اختيارن ۾ گهٽتائي، ۽ آرٽيڪل 243 ۾ ترميم شامل آهي. مجموعي طور تي 27هين ترميم تحت آئين جي مختلف شقن ۾ 46 ترميمون تجويز ڪيون ويون آهن.
ذريعن جو چوڻ آهي ته آرمي، ايئرفورس ۽ نيوي کان پوءِ هاڻ چوٿين فوجي شاخ آرمي راڪٽ فورس هوندي. چيف آف آرمي اسٽاف کي هاڻ “ڪمانڊر آف ڊي فنس فورسز” جو لقب به ڏنو ويندو، جيڪي سڀني فوجي شاخن جي هم آهنگي جا ذميوار هوندا. راڪٽ فورس ۾ اسٽرٽيجڪ پلان ڊويزن (SPD) به شامل هوندي، جيڪا اڳ ۾ چيئرمين جوائنٽ چيفس آف اسٽاف جي ماتحت هئي. هاڻ چيئرمين جوائنٽ چيفس آف اسٽاف جو عهدو ختم ڪيو ويندو ۽ ان جي جاءِ تي ڪمانڊر آف ڊي فنس فورسز جو عهدو قائم ڪيو ويندو.
ذريعن موجب، ڪابينا جي منظوري کان پوءِ ترميمي بل سينيٽ ۾ پيش ڪيو ويندو، جنهن کان پوءِ قومي اسيمبلي ۽ سينيٽ جي گڏيل پارلياماني ڪميٽي قائم ڪئي ويندي، جيڪا ترميمن تي غور ڪري پنهنجي رپورٽ پيش ڪندي. ڪميٽي ۾ مختلف سياسي جماعتن جي نمائندن کي خاص طور شامل ڪيو ويندو.
