اسلام آباد (ويب ڊيسڪ) پاڪستان جي آئين ۾ تجويز ڪيل ستاويهين آئيني ترميم جي مسودي ۾ صدر کي تاحيات قانوني تحفظ ڏيڻ جي شق شامل ڪئي وئي آهي، جنهن تحت صدر خلاف نه ته ڪو ڪيس داخل ٿي سگهندو ۽ نه ئي کيس گرفتار يا سزا ڏئي سگهبي.
اتحادي جماعتن پاران ترميمي مسودي ۾ تجويزون شامل ڪرڻ ۽ ڪڍڻ جو عمل جاري آهي، جتي پاڪستان پيپلز پارٽي جي مطالبن تي آرٽيڪل 248-B ۾ ترميم شامل ڪئي وئي آهي.
ذريعن مطابق، گڏيل پارلياماني ڪميٽي ۾ پيپلز پارٽي طرفان صدر کي تاحيات تحفظ ڏيڻ جي تجويز پيش ڪئي وئي، جيڪا هاڻي مسودي جو حصو بڻجي چڪي آهي.
قانوني ماهرن ۽ سياسي مبصرن پاران ان ترميم تي بحث جاري آهي، جتي ڪجهه ان کي احتساب جي عمل لاءِ خطرو قرار ڏئي رهيا آهن، جڏهن ته ٻيا ان کي حڪومتي استحڪام لاءِ ضروري قدم سمجهي رهيا آهن.
