اسلام آباد (ويب ڊيسڪ) سينيٽ ۾ ستائيهين آئيني ترميم جي منظوري لاءِ اجلاس سينيٽر منظور احمد جي صدارت هيٺ جاري آهي، جتي مختلف سياسي اڳواڻن پنهنجا خيال ظاهر ڪري رهيا آهن. وزير قانون اعظم نذير تارڙ دعويٰ ڪئي آهي ته سينيٽ ۾ حڪومت جا نمبر مڪمل آهي ۽ ووٽرن جي موجودگي بعد ووٽنگ شروع ڪئي ويندي.
اجلاس کان اڳ پارليامينٽ هائوس ۾ گهنٽيون وڄايون ويون، جنهن بعد ناشتي ۾ آيل ايوان جا ميمبر ناشتو ڪري واپس آيا. سينيٽر دنیش ڪمار موجب ناشتي ۾ انڊا، پراٺا، حلوو ۽ ڪروسينٽ شامل هئا. هن چيو ته “جنهن جو نمڪ کائجي، ان سان وفاداري ڪجي.”
پيپلز پارٽي جي سينيٽر شهادت اعوان آئيني عدالت کي وقت جي ضرورت قرار ڏنو، جڏهن ته ڊپٽي وزيراعظم اسحاق ڊار صحافين سان ڳالهائيندي چيو ته “انشاءالله نمبر پورا آهن.”
ٻئي طرف، جميعت علماءِ اسلام (ف) ستاويھين ترميم جي مخالفت جو فيصلو ڪيو آهي. سينيٽر ڪمراڻ مرتضيٰ چيو ته حڪومت تي اعتماد ناهي، ۽ ترميم بنا مشاورت پيش ڪئي وئي آهي، جيڪا 26 ھين ترميم کي رول بيڪ ڪري ٿي.
سينيٽر فيصل واوڊا ترميم جي منظوري کي جهموري روايت قرار ڏيندي چيو ته “ستاويھين ترميم پاس ٿي وئي، هاڻ 28هين ترميم جي تياري ڪريو.” هن ترميم کي ملڪ جي دفاع ۽ جهموريت لاءِ ضروري قرار ڏنو.
گذريل ڏينهن قومي اسيمبلي ۽ سينيٽ جي گڏيل پارلياماني ڪميٽي ترميم جي شق وار منظوري ڏني هئي، اجلاس فاروق ايچ نائڪ جي صدارت هيٺ ٿيو.
