لنڊن (ويب ڊيسڪ) برطانوي ڪمپني آف شور انرجيز بحيره شمالي ۾ تيل جي کنوئن تي ڪم ڪندڙ مزدورن کي خبردار ڪيو آهي ته جيڪڏهن انهن جو وزن مقرر حد کان وڌيڪ رهيو ته نوڪري وڃڻ جو خطرو آهي. نومبر 2026 کان آف شور پليٽفارم تي وڃڻ لاءِ مزدورن جو وڌ کان وڌ وزن 124.7 ڪلوگرام (ڪپڙن سميت) مقرر ڪيو ويو آهي.
اهو فيصلو برطانوي ڪوسٽ گارڊ جي وارننگ بعد ڪيو ويو، جنهن موجب ريسڪيو هيليڪاپٽر جي ونچ 249 ڪلوگرام وزن کڻي سگهي ٿو، جنهن ۾ ريسڪيو ورڪر (90.3 ڪلوگرام)، اسٽريچر (29 ڪلوگرام) ۽ بچاءُ جو سامان (5 ڪلوگرام) شامل آهي.
ڪمپني موجب، هن وقت 2200 کان وڌيڪ مزدورن جو وزن مقرر حد کان وڌيڪ آهي، ۽ جيڪڏهن انهن وزن گهٽ نه ڪيو ته ملازمت ختم ٿي سگهي ٿي. اها پاليسي ميرٽائم اينڊ ڪوسٽ گارڊ ايجنسي جي هدايتن جي روشني ۾ تيار ڪئي وئي آهي ته جيئن هنگامي حالتن ۾ محفوظ ريسڪيو ممڪن بڻجي.
برطانوي ميڊيا موجب، 2008 کان پوءِ آف شور مزدورن جو اوسط وزن 10 ڪلوگرام وڌي چڪو آهي. نئين پاليسي مزدورن لاءِ سخت چئلينج بڻجي سگهي ٿي، خاص طور تي انهن لاءِ جن جي صحت يا جسماني ساخت وزن گهٽائڻ ۾ رڪاوٽ بڻجي سگهي ٿي.
