لاهور (ويب ڊيسڪ) اردو ٻولي ۽ تعليم جي ناليواري ماهر ڊاڪٽر عارفه سيده زهره لاڏاڻو ڪري ويئي، جنهن تي علمي، ادبي ۽ سماجي حلقن ۾ گهرو ڏک ۽ افسوس جو اظهار ڪيو ويو آهي.
ڊاڪٽر عارفه سيده زهره فارمن ڪرسچن ڪاليج ۾ تاريخ جي پروفيسر طور خدمتون سرانجام ڏئي رهي هئي، جڏهن ته هوءَ لاهور ڪاليج فار ويمن يونيورسٽي جي اڳوڻي پرنسپل به رهي چڪي آهي. هوءَ پنجاب جي نگران صوبائي وزير ۽ قومي ڪميشن براءِ عورتن جي چيئرپرسن طور به ذميواريون نڀائي چڪي آهي.
هن گورنمينٽ ڪاليج لاهور مان اردو ۾ ايم اي ۽ يونيورسٽي آف هوائي مان تاريخ ۾ پي ايڇ ڊي ڪئي. 1986ع کان 2009ع تائين گورنمينٽ ڪاليج فار ويمن گلبرگ لاهور جي پرنسپل رهي. هوءَ ست ٻولين تي عبور رکندي هئي ۽ ڪيترين ئي تعليمي، انتظامي، سماجي ۽ ثقافتي ڪميٽين جي ميمبر رهي.
ڊاڪٽر عارفه اردو ادب، ٻولي ۽ ڏکڻ ايشيائي سماجي معاملن تي گہري بصيرت رکندڙ هئي. صدر مملکت آصف علي زرداري پنهنجي تعزيتي بيان ۾ چيو ته ڊاڪٽر عارفه جي وفات علمي دنيا لاءِ ناقابلِ تلافي نقصان آهي. هن جي علم، تحقيق ۽ قومي ٻولي جي واڌاري لاءِ ڪيل خدمتون هميشه ياد رکيون وينديون.
مرحومه جي علمي ورثي کي خراج تحسين پيش ڪندي، ڪيترن ئي علمي ادارن ۽ ادبي شخصيتن سندس لاڏاڻي کي قوم لاءِ وڏو نقصان قرار ڏنو آهي.
