ڪراچي (نمائندو خاص) گڏاپ ٿاڻي ۾ مقرر پوليس اهلڪار شبير احمد بلوچ مبينا طور تي علائقي واسين ۽ دڪاندارن لاءِ عذاب بڻجي ويو آهي، جنهن خلاف بنديچا اسٽاپ جي رهاسين احتجاجي مظاهرو ڪندي الزام هنيو آهي ته اهلڪار هر روز شراب جي نشي ۾ دڪانن تي اچي ڀتو وٺڻ جي ڪوشش ڪري ٿو، ۽ انڪار ڪرڻ تي ڀڃ ڊاهه، گارگند ۽ ڪوڙا ڪيس داخل ڪرڻ جون ڌمڪيون ڏئي ٿو۔
علائقي واسين موجب، شبير بلوچ جا رويا حد کان وڌي چڪا آهن۔ سندس نشي ۾ هُلڙبازي سبب علائقي ۾ خوف ۽ بيچيني پيدا ٿي وئي آهي۔ دڪاندارن ٻڌايو ته اهلڪار ڪيترائي ڀيرا دڪانن ۾ داخل ٿي سامان اڇلايو، ڳوٺاڻن کي مارڪٽ ڪئي ۽ علائقي جو امن بگاڙيو۔
دڪاندارن شبير بلوچ جي ڪرتوتن جون ويڊيوز به تيار ڪري ورتيون آهن، جيڪي سوشل ميڊيا تي وائرل ٿيڻ بعد انتظاميا تي دٻاءُ وڌائي رهيون آهن۔
احتجاج ڪندڙن ۾ مقامي واپاري، ڳوٺاڻا ۽ سماجي اڳواڻ شامل هئا، جن صوبائي گهرو وزير، آءِ جي سنڌ، ايڊيشنل آءِ جي ڪراچي ۽ ايس ايس پي ملير کان مطالبو ڪيو ته فوري طور تي گڏاپ ٿاڻي جي اهلڪار شبير احمد بلوچ خلاف ڪارروائي ڪري انصاف فراهم ڪيو وڃي، ته جيئن علائقي واسي سک جو ساھ کڻي پنهنجو ڪاروبار جاري رکي سگهن۔
رهواسين چيو ته شبير بلوچ روزاني دڪانن تي اچي شراب جي نشي ۾ غيراخلاقي رويو اختيار ڪري ٿو ۽ ڀتو نه ڏيڻ تي ڪوڙا ڪيس داخل ڪرڻ جون ڌمڪيون ڏئي ٿو۔ انهن چيو ته اسان وٽ ان جا سڀ ثبوت موجود آهن، پر انتظاميا خاموش آهي۔
علائقي واسي ۽ دڪاندار حڪومت کان مطالبو ڪري رهيا آهن ته شرابي پوليس اهلڪار خلاف معطلي ۽ عدالتي جاچ جو حڪم جاري ڪيو وڃي، جيئن پوليس وردي ۾ موجود بدنام عناصر کي بي نقاب ڪري امن بحال ڪري سگهجي۔
