ڪراچي(ويب ڊيسڪ) آمريڪي خام تيل سان ڀريل ٻيو وڏو بحري جهاز “ايم ٽي الباني” ٻن هفتن بعد پاڪستان جي سامونڊي حدن ۾ داخل ٿي ويو آهي، جيڪو سومر جي شام بلوچستان ۾ سنرجيڪو آئل ٽرمينل تي برٿنگ ڪندو.
ايم ٽي الباني پاڪستان جي بندرگاهن تي پهچندڙ آمريڪا جو ٻيو وڏو تيل بردار جهاز آهي، جنهن سان پاڪستان ۽ آمريڪا جي وچ ۾ تجارتي لاڳاپن جو نئون باب کوليو ويو آهي.
سنرجيڪو آئل ڪمپني طرفان پهريون ڀيرو پاڪستان ۾ 10، 10 لک بيرل ويسٽ ٽيڪساس انٽرميڊيئيٽ (WTI) خام تيل درآمد ڪيو ويو آهي، جيڪو ٻن الڳ بحري جهازن ذريعي آندو ويو.
ان کان اڳ 29 آڪٽوبر تي پهريون آمريڪي ڪارگو “ايم ٽي پيگاسس” پاڪستان پهتو هو، جيڪو 14 سيپٽمبر تي هيئوسٽن مان روانو ٿيو ۽ سنرجيڪو جي آف شور ٽرمينل تي لنگر انداز ٿيو.
سنرجيڪو آئل ڪمپني اسلام آباد ۽ واشنگٽن جي وچ ۾ ٿيل اهم تجارتي معاهدي کانپوءِ آمريڪي خام تيل جي تاريخي درآمد سان ٻنهي ملڪن جي واپار کي نئون رخ ڏنو آهي.
سنرجيڪو جو قدم پاڪستان ۾ توانائي جي شعبي لاءِ هڪ اهم اڳڀرائي طور ڏٺو پيو وڃي، جيڪو مستقبل ۾ وڌيڪ تجارتي موقعن جو در کولڻ جي اميد ڏياري ٿو.
