اسلام آباد (خصوصي رپورٽ) 27هين آئيني ترميم تي عدليا جي اندر ڇڪتاڻ سامهون اچي وئي آهي، جتي سپريم ڪورٽ جي سينيئر جج جسٽس اطهر من الله پاران چيف جسٽس يحيٰ آفريدي کي لکيل خط منظر عام تي اچي ويو آهي، جنهن ۾ عدليا جي تاريخي خاموشين، سياسي دٻاءَ، ۽ سچ جي دٻجڻ تي سخت خدشا ظاهر ڪيا ويا آهن۔
خط جا اهم انڪشاف:
- جسٽس اطهر من الله لکيو ته سپريم ڪورٽ اڪثر طاقتور سان بيٺي رهي، عوام سان نه۔
- ذوالفقار علي ڀٽو جي عدالتي ڦاسي کي عدليا جو ناقابل معافي ڏوهه قرار ڏنو۔
- بينيزير ڀٽو، نواز شريف، ۽ مريم نواز خلاف ڪارروائين کي ساڳي جبر جي ڪڙيون سڏيو۔
- عمران خان سان ٿيندڙ سلوڪ کي به ان ئي تسلسل جو حصو قرار ڏنو۔
- لکيو ته اسلام آباد هاءِ ڪورٽ کي عوامي اعتماد حاصل ڪرڻ تي نشانو بڻايو ويو۔
- بهادر ججن جا خط ۽ اعتراف سپريم ڪورٽ جي ضمير تي بوجھ آهن۔
- چيو ته سچ ڄاڻون ٿا، پر اهو رڳو چانهه خانن جي سرگوشين تائين محدود آهي۔
عدليا تي دٻاءُ ۽ احتساب:
جسٽس اطهر من الله وڌيڪ لکيو ته باهرين مداخلت هاڻ راز نه پر کليل حقيقت آهي، ۽ جيڪو جج سچ ڳالهائي ٿو، اهو انتقام جو نشانو بڻجي ٿو، جڏهن ته جيڪو جج نه ٿو جهڪي، ان خلاف احتساب جو هٿيار استعمال ڪيو وڃي ٿو۔
قانوني برادري جو ردعمل:
ان کان اڳ سپريم ڪورٽ جي 38 اڳوڻن لا ڪلرڪس به چيف جسٽس کي خط لکي فل ڪورٽ ميٽنگ گهرائڻ جو مطالبو ڪيو آهي۔ انهن لکيو ته اڄ عدليا کي 2007 کان به وڌيڪ خطرا لاحق آهن، ۽ چيف جسٽس جو ردعمل طئي ڪندو ته تاريخ کيس ڪيئن ياد رکندي۔
خط ۾ خبردار ڪيو ويو ته يا ته توهان سپريم ڪورٽ جو دفاع ڪندڙ چيف جسٽس بڻجي تاريخ ۾ ياد رهندؤ، يا ان کي دفن ڪندڙ طور سڃاتو ويندو۔
هي خط نه رڳو عدليا جي اندروني بيچينيءَ جو اظهار آهي، پر 27هين ترميم جي حوالي سان عدالتي آزاديءَ بابت وڌندڙ خدشن کي به اجاگر ڪري ٿو۔
