اسلام آباد (بيورو) اسلام آباد جي جوڊيشل ڪمپليڪس ٻاهران اڱاري ڏينهن ٻنپهرن ساڍي 12 وڳي ڌماڪو ٿيو، جتي پارڪ ٿيل گاڏي زوردار ڌماڪي سان تباهه ٿي وئي۔
ڌماڪي جي آواز پري پري تائين ٻڌي وئي، ۽ باهه ويجهي گاڏين تائين پکڙجي وئي۔ ابتدائي رپورٽن موجب، 12 ڄڻا شهيد ۽ 27 کان وڌيڪ زخمي ٿيا، جن ۾ وڪيل ۽ سائلين شامل آهن۔ اسپتال ذريعن موجب، ڪيترا زخمي انتهائي نازڪ حالت ۾ آهن۔
پوليس ذريعن مطابق، ڌماڪو خودڪش نوعيت جو هو، ۽ حملو ڪندڙ جو سر واقعي واري هنڌ تان مليو آهي۔ پوليس دعويٰ ڪئي ته هندستان جي حمايت يافته ۽ افغان طالبان جي پراڪسي تنظيم فتنه الخوارج هن حملو ۾ ملوث آهي۔ ڌماڪي وقت ڪچهري علائقو ماڻهن سان ڀريل هو، جنهن سبب ڪيترائي سائل زخمي ٿيا۔ زخمين کي فوري طور پمز اسپتال منتقل ڪيو ويو، ۽ علائقو مڪمل طور سيل ڪيو ويو۔
ڌماڪي کان پوءِ جوڊيشل ڪمپليڪس خالي ڪرايو ويو، جتي وڪيل، ججز ۽ سائلين کي پٺئين رستي کان ٻاهر ڪڍيو ويو۔ وفاقي گهرو وزير محسن نقوي واقعي واري هنڌ پهچي آءِ جي اسلام آباد کان بريفنگ ورتي۔ هن چيو ته پهريائين حملو ڪندڙ جي سڃاڻپ ڪئي ويندي، ۽ وانا حملي ۾ به افغانستان ملوث هو، جتي علاقائي ڪليئرنس جاري آهي۔
محسن نقوي چيو ته ڪچهري حملي ۾ ملوث عنصرن کي جلد سامهون آندو ويندو۔ هي واقعو نه صرف وفاقي دارالحڪومت جي سيڪيورٽي تي سوال اٿاري ٿو، پر خطي ۾ وڌندڙ دهشتگردي جي خطرن جي سنجيده نشاندهي به ڪري ٿو۔ جاچ جاري آهي، ۽ ذميوارن جي سڃاڻپ لاءِ ادارا سرگرم آهن۔
