ڪراچي (ويب ڊيسڪ) بلاول هائوس چورنگي ويجهو سييف سٽي پروجيڪٽ جي نگراني لاءِ لڳايل ڪيمرائن سان ڳنڍيل ڊسٽريبيوشن باڪس چوري ٿي ويو، جنهن سبب علائقي ۾ لڳايل ڪيمرا بند ٿي ويا. واقعي کان پوءِ سيڪيورٽي نظام جي مؤثريت تي سوال اٿاريا پيا وڃن.
سييف سٽي پروجيڪٽ جي ڊائريڪٽر جنرل آصف اعجاز شيخ واقعي جي تصديق ڪندي ٻڌايو ته چوري ٿيل ڊسٽريبيوشن باڪس ۾ لکين رپين جو سامان موجود هو. هن چيو ته جاچ ڪئي پئي وڃي ته چوري دوران الارم ڇو نه وڳي ۽ سيڪيورٽي سسٽم ڪيئن خاموش رهيو.
واقعي کان پوءِ علائقي مان ڪيمرا پولن تان لاٿي ڇڏيا ويا آهن، جنهن سبب بلاول هائوس جي ويجهو موجود مصروف ترين چورنگي تي نگراني جو نظام متاثر ٿيو آهي.
هي واردات ان وقت سامهون آئي آهي، جڏهن ڪراچي ۾ فيس ليس ٽڪيٽنگ سسٽم تحت ٽريفڪ قانون جي ڀڃڪڙي ڪندڙن کي اي چالان جاري ڪيا پيا وڃن. اهڙي صورتحال ۾ سييف سٽي جي ڪيمرائن جو بند ٿيڻ ۽ سامان جي چوري انتظامي غفلت جي نشاندهي ڪري ٿو.
انتظاميه پاران جاچ جو عمل شروع ڪيو ويو آهي، جڏهن ته شهر جي حساس علائقن ۾ سيڪيورٽي وڌائڻ تي غور ڪيو پيو وڃي.
