اسلام آباد (ويب ڊيسڪ) چيف جسٽس پاڪستان جسٽس يحييٰ آفريدي جي صدارت هيٺ سپريم ڪورٽ جو فل ڪورٽ اجلاس ٿيو، جنهن ۾ سپريم ڪورٽ رولز 2025 ۾ اهم ترميمون اتفاق سان منظور ڪيون ويون.
اجلاس جي پڌرائي موجب، ترميمون سپريم ڪورٽ رولز 2025 جي آرڊر I جي رول 1(4) تحت قائم ڪيل ڪميٽي جي سفارشن جي روشني ۾ ڪيون ويون. ڪميٽي ۾ جسٽس شاهد وحيد، جسٽس عرفان سعادت خان، جسٽس نعيم اختر افغان ۽ جسٽس عقيلي احمد عباسي شامل هئا، جن سپريم ڪورٽ رولز 1980 جو تفصيلي جائزو وٺي، نون رولز جو مسودو تيار ڪيو ۽ قانوني پيچيدگين کي دور ڪرڻ لاءِ تجويزون پيش ڪيون.
فل ڪورٽ اجلاس ۾ هر ميمبر جي انفرادي محنت کي ساراهيو ويو ۽ انهن جي ڪردار کي “اهم ۽ قابلِ تحسين” قرار ڏنو ويو.
پڌرائي ۾ واضح ڪيو ويو ته سپريم ڪورٽ رولز 2025 ۾ ڪيل تبديليون عدالتي نظام جي بهتري، بهتر سروس ڊليوري ۽ عوام کي سستو ۽ جلد انصاف فراهم ڪرڻ جي مقصد سان ڪيون ويون آهن.
ان اجلاس دوران فل ڪورٽ متفقه طور تي ايڊووڪيٽ محمد منير پراچه کي سپريم ڪورٽ رولز 2025 جي آرڊر IV جي رول 5 تحت “سينيئر ايڊووڪيٽ سپريم ڪورٽ آف پاڪستان” جو درجو ڏيڻ جي منظوري به ڏني.
فل ڪورٽ اعلان ڪيو ته سپريم ڪورٽ رولز 2025 کي باضابطه طور تي اپڊيٽ ڪيو ويو آهي.
