اسلام آباد (ويب ڊيسڪ) صدر آصف علي زرداري سپريم ڪورٽ جي ٻن سينئر ججن، جسٽس منصور علي شاهه ۽ جسٽس اطهر من الله، جون استعيفائون قبول ڪري ورتيون آهن. ٻنهي ججن گذريل ڏينهن 27هين آئيني ترميم جي حوالي سان اختلافن سبب پنهنجا عهدا ڇڏيا هئا.
صدر جي آفيس تصديق ڪئي آهي ته استعيفائون سڌو سنئون صدر ڏانهن موڪليون ويون، جيڪي هاڻي آئيني طريقيڪار تحت منظور ڪيون ويون آهن.
استعيفيٰ کان اڳ، ٻنهي ججن شام دير سان پنهنجي چيمبرن ۾ ٻين ججن سان الوداعي ملاقاتون ڪيون، جتي ساٿين کين استعيفيٰ نه ڏيڻ لاءِ قائل ڪرڻ جي ڪوشش ڪئي. باوجود ان جي، جسٽس منصور علي شاهه ۽ جسٽس اطهر من الله پنهنجي فيصلي تي قائم رهيا.
استعيفائن کان پوءِ، ٻنهي ججن سپريم ڪورٽ جي عمارت ڇڏڻ جو فيصلو ڪيو، جنهن سان عدالتي نظام ۾ ٻه عهدا خالي ٿي ويا آهن. نئين مقررين بابت اڳتي جي قدمن جو انتظار ڪيو پيو وڃي.
