لنڊن (ويب ڊيسڪ) برطانوي اخبار گارڊين دعويٰ ڪيو آهي ته آمريڪا غزه جي ڊگهي مدي واري ورهاست لاءِ منصوبو تيار ڪري ورتو آهي، جنهن تحت علائقي کي گرين زون ۽ ريڊ زون ۾ ورهائڻ جي تجويز ڏني وئي آهي. رپورٽ موجب گرين زون عالمي ۽ اسرائيلي فوجي ڪنٽرول هيٺ هوندو، جڏهن ته ريڊ زون ملبي تي مشتمل هوندو. ابتدائي مرحلي ۾ غير ملڪي فوجي دستا اسرائيلي اهلڪارن سان گڏ مقرر ڪيا ويندا. گرين زون جي تعمير نو سان فلسطيني شهرين کي منتقل ڪرڻ جي حڪمت عملي تيار ڪئي وئي آهي، جڏهن ته متبادل محفوظ ڪميونٽين جو منصوبو ختم ڪيو ويو آهي.
رپورٽ ۾ چيو ويو آهي ته غزه ۾ مستقل امن ۽ فلسطيني حڪمراني بابت آمريڪي واعدن تي سوال اٿڻ لڳا آهن. انساني حقن جي عالمي تنظيمن طرفان آمريڪي منصوبي تي سخت تحفظات ظاهر ڪيا ويا آهن ۽ خدشو آهي ته امن فورس اسرائيلي انخلا ۽ تعمير نو کانسواءِ غزه ۾ ڦاسي پوندي. آمريڪا يورپي ملڪن کي امن فورس جو بنيادي حصو بڻائڻ جي تجويز ڏني آهي، پر فوجي دستا موڪلڻ بابت هچڪچاهٽ سبب منصوبو غير حقيقي قرار ڏنو ويو آهي. ابتدائي طور تي چند سو اهلڪار، بعد ۾ 20 هزار فوجين تائين فورس وڌائڻ جي تجويز تي غور جاري آهي، جڏهن ته جارحاڻين ڪارروائين جي خدشن سبب فوجي دستا صرف گرين زون تائين محدود رکيا ويندا.
گارڊين موجب منصوبي ۾ اسرائيلي انخلا لاءِ ڪو واضح ٽائيم فريم ناهي ڏنو ويو، فلسطيني پوليس فورس کي محدود ڪردار تائين محدود ڪيو ويو آهي. غزه جو 80 سيڪڙو کان وڌيڪ حصو تباهه ٿي چڪو آهي، جتي فوري تعمير نو جي سخت ضرورت آهي. معصوم فلسطيني شهرين لاءِ امداد جي ترسيل ۾ اسرائيلي رڪاوٽون برقرار آهن، جڏهن ته 20 لک کان وڌيڪ فلسطيني ريڊ زون ۾ بي گهر ۽ بنيادي سهولتن کان محروم آهن.
