ڪراچي (اسٽاف رپورٽر) سنڌ اسيمبلي جي ميمبر ۽ وزيراعليٰ سنڌ جي اقليتي معاملن بابت خاص معاون ڊاڪٽر شام سندر آڊواڻي، اطلاعات کاتي جي سرپرستي هيٺ قائم سوشل ميڊيا آفيس جو دورو ڪيو ۽ اتي ڪم ڪندڙ ٽيم سان ملاقات ڪئي.
آفيس پهچڻ تي ترجمان سنڌ حڪومت سمعتا افضل سيد، ڊجيٽل ٽيم جي سربراهه، ۽ ڊپٽي ڊائريڪٽر اطلاعات سارنگ لطيف چانڊيو پاران ڊاڪٽر آڊواڻي جو پرجوش استقبال ڪيو ويو.
ڊاڪٽر شام سندر آڊواڻي آفيس جي مختلف شعبن جو تفصيلي جائزو ورتو ۽ ٽيم جي ڪارڪردگي کي ساراهيندي چيو ته سوشل ميڊيا ٽيم جديد دور جي تقاضائن موجب بهترين ڪم ڪري رهي آهي. خاص طور تي “آءِ ورڪ فار سنڌ” ٽيم جي محنت کي اجاگر ڪندي هن چيو ته هي رڳو هڪ منصوبو نه، پر پاڪستان پيپلز پارٽي جي قيادت جي وژن ۽ عوام سان ڪيل واعدن جي عملي شڪل آهي.
ملاقات دوران، ڊاڪٽر آڊواڻي صوبائي وزير شرجيل انعام ميمڻ جي موثر ڪوششن جي به واکاڻ ڪئي، جن جي اڳواڻي ۾ اطلاعات کاتي ۾ جديديت ۽ شفافيت آندي وئي آهي.
دوري جي پڄاڻي تي ڊاڪٽر آڊواڻي، سمعتا افضل سيد ۽ سارنگ لطيف چانڊيو سان گڏجي مختلف معاملن تي خيالن جي ڏي وٺ پڻ ڪئي، جنهن دوران مستقبل جي منصوبابندي ۽ سوشل ميڊيا جي ذريعي سرڪاري پاليسين جي مؤثر نموني تشهير تي به ڳالهيون ڪيون ويون.
