لاهور (ويب ڊيسڪ) سپريم ڪورٽ جي سينيئر ججن جسٽس منصور علي شاهه ۽ جسٽس اطهر من الله جي استعيفائن کانپوءِ هاڻ لاهور هاءِ ڪورٽ جي جسٽس شمس محمود مرزا به پنهنجي عهدي تان استعيفيٰ ڏئي ڇڏي آهي.
جسٽس شمس محمود مرزا پنهنجي استعيفيٰ صدرِ مملڪت ڏانهن اماڻي ڇڏي ۽ بنا ڪنهن پروٽوڪول جي پنهنجو چيمبر خالي ڪري واپس روانو ٿي ويو. هو 22 مارچ 2014 تي لاهور هاءِ ڪورٽ جي ايڊشنل جج طور حلف کنيو هو ۽ 2028 ۾ رٽائر ٿيڻا هئا. هو سپريم ڪورٽ جي اڳوڻي جج جسٽس ضياء محمود مرزا جا فرزند آهن ۽ لاهور هاءِ ڪورٽ جي انتظامي ڪميٽي جو به حصو هئا.
ذريعن موجب، جسٽس مرزا جي بدلي 27هين آئيني ترميم کانپوءِ متوقع هئي، جيڪا عدليه جي جوڙجڪ ۾ بنيادي تبديليون آڻڻ لاءِ منظور ڪئي وئي آهي. ان ترميم تي عدليه جي آزادي بابت سخت خدشا ظاهر ڪيا ويا آهن.
ياد رهي ته جسٽس منصور علي شاهه پنهنجي استعيفيٰ ۾ لکيو هو ته 27هين ترميم عدليه کي حڪومت جي تابع بڻائي ڇڏيو آهي، جيڪا آئيني جمهوريت جي روح تي سخت وار آهي. هن چيو ته “اها ترميم عدليه جي آزادي کي لتاڙي رهي آهي، ۽ مان اهڙي نظام جو حصو نه ٿي سگهان جيڪو ان اداري جي بيخ ڪني ڪري، جنهن جي تحفظ جو مون حلف کنيو هو.”
ساڳي ريت، جسٽس اطهر من الله به پنهنجي استعيفيٰ ۾ لکيو ته “جنهن آئيني نظام جي تحفظ جو حلف کنيو هو، اهو هاڻ باقي نه رهيو آهي.” هن چيو ته هو پنهنجي ضمير جي آواز تي لبڪيندي استعيفيٰ ڏئي رهيو آهي.
اهي استعيفائون ملڪ جي عدالتي تاريخ ۾ هڪ نئون موڙ آڻي رهيون آهن، جتي عدليه جي آزادي بابت بحث شدت اختيار ڪري ويو آهي. قانوني حلقن ۾ ان صورتحال کي انتهائي ڳڻتي جوڳي قرار ڏنو پيو وڃي.
