راولپنڊي(ويب ڊيسڪ) پاڪستان ۽ سري لنڪا جي وچ ۾ راولپنڊي ڪرڪيٽ اسٽيڊيم ۾ ٿيل ٽن ون ڊي ميچن جي سيريز دوران راولپنڊي پوليس طرفان فول پروف سيڪيورٽي ۽ ٽريفڪ جا بهترين انتظام ڪيا ويا.
سي پي او سيد خالد همداني جي اڳواڻيءَ ۾ 5500 کان وڌيڪ پوليس آفيسر ۽ اهلڪار سيڪيورٽي جا فرض نڀايا. ان دوران ايس ايس پي آپريشنز، ايس ايس پي انويسٽيگيشن، چيف ٽريفڪ آفيسر ۽ ٻين اعليٰ آفيسرن انتظامن جي مسلسل نگراني ڪئي.
350 کان وڌيڪ ٽريفڪ اهلڪارن شهر ۾ ٽريفڪ جي رواني کي يقيني بڻايو، جنهن سبب شائقين کي ڪنهن به پريشاني کي منهن نه ڏيڻو پيو. سي پي او خالد همداني سيڪيورٽي انتظامن جو تفصيلي جائزو ورتو ۽ هدايتون ڏنيون ته شوقينن ۽ ٽيم لاءِ محفوظ ۽ آرامده ماحول مهيا ڪيو وڃي.
راولپنڊي پوليس ڪرڪيٽ ٽرائي سيريز لاءِ به بهترين سيڪيورٽي ڏيڻ لاءِ پرعزم آهي. سي پي او پاڪ فوج، رينجرز، ضلعي انتظاميه ۽ ٻين سيڪيورٽي ادارن جو شڪريو ادا ڪيو، جن جي سهڪار سان انتظامن کي فول پروف بڻايو ويو.
