اسلام آباد (ويب ڊيسڪ) اسلام آباد هاءِ ڪورٽ ۾ ميڊيڪل بنيادن تي ضمانت جي درخواست تي ٻڌڻي دوران جسٽس محسن اختر کياني جا دلچسپ ۽ طنزيه رمارڪس سامهون آيا، جن عدالت ۾ موجود ماڻهن جي توجهه ڇڪائي ورتي.
سماعت دوران جسٽس کياني چيو:
“جيڪو ماڻهو جيل ۾ گهڻو وقت گذاري ٿو، اهو پوءِ ميڊيڪل گرائونڊ تي ئي ٻاهر نڪري ٿو، ۽ ٻاهر اچڻ بعد بلڪل ٺيڪ ٿي وڃي ٿو.”
هن وڌيڪ چيو:
“اهو شخص پوءِ ٻاهر ملڪ گھمي ٿو، ۽ کيس ڪجهه به نٿو ٿئي”.
هي رمارڪس ميڊيڪل بنيادن تي ضمانت جي وڌندڙ رجحان تي تنقيد طور ڏٺا پيا وڃن، جتي جيل مان نڪرڻ لاءِ صحت جي خراب حالت کي بنياد بڻايو وڃي ٿو، پر ضمانت ملڻ بعد ساڳيا ماڻهو مڪمل صحتمند نظر اچن ٿا.
عدالت ميڊيڪل گرائونڊ تي ضمانت جي درخواست تي ٻڌڻي جاري رکي، جڏهن ته جسٽس کياني جا رمارڪس عدالتي نظام جي حقيقتن ۽ تضادن تي روشني وجھڻ جو سبب بڻيا.
