اسلام آباد (ويب ڊيسڪ) ناڻي واري وفاقي سينيٽر محمد اورنگزيب چيو آهي ته پاڪستان معاشي استحڪام کان پوءِ هاڻ پائيدار واڌاري جي طرف وڌي رهيو آهي، پر تيزيءَ سان وڌندڙ آبادي ۽ موسمياتي تبديليون ملڪ لاءِ ٻه وڏا وجودي خطرا بڻجي چڪا آهن، جن سان منھن ڏيڻ لاءِ وسيلن جي منصفاڻي ورهاست ۽ پاليسين ۾ اصلاحات ضروري آهن.
اسلام آباد ۾ پاپوليشن ڪائونسل جي اهتمام هيٺ ڊسٽرڪٽ ولنرابيليٽي انڊيڪس آف پاڪستان جي اجرا جي موقعي تي تقريب کي خطاب ڪندي ناڻي واري وزير چيو ته پاڪستان ۾ آبادي جي واڌ جي شرح 2.5 سيڪڙو جي ويجهو آهي، جيڪا تمام گهڻي آهي. جيڪڏهن آبادي تي ڪنٽرول نه ڪيو ويو ته جي ڊي پي ۾ واڌ بي معنيٰ ٿي ويندي. هن زور ڏنو ته وسيلن جو انتظام آبادي جي حساب سان ڪرڻ لازمي آهي.
هن چيو ته پاڪستان ۾ 40 سيڪڙو ٻار سٽنٽنگ جو شڪار آهن، جڏهن ته 50 سيڪڙو ڇوڪريون اسڪولن کان ٻاهر آهن، جيڪي سماجي ترقي لاءِ انتهائي سنجيده مسئلا آهن. موسمياتي تبديليءَ کي به وجودي خطرو قرار ڏيندي وزير خزانه چيو ته موسمياتي موزونيت لاءِ وزارت ماحوليات ۽ لاڳاپيل ادارن سان هر قسم جي سهڪار لاءِ تيار آهيون.
هن ٻڌايو ته آءِ ايم ايف ۽ عالمي بينڪ جي سالياني اجلاس دوران موسمياتي اتحاد جي وزراءِ خزانه جي اجلاس ۾ شرڪت ڪئي، جتي موسمياتي فنانس ۽ فنڊز جي ورهاست ۾ وزراءِ خزانه جو ڪردار انتهائي اهم قرار ڏنو ويو.
وزير خزانه چيو ته حڪومت پسماندہ ضلعن جي ترقي لاءِ قدم کڻي رهي آهي، جتي ديهي علائقن مان شهرن ڏانهن لڏپلاڻ سبب ڪچي آباديون وڌي رهيون آهن، جن ۾ صاف پاڻي، نيڪال ۽ بنيادي سهولتن جي کوٽ آهي، جنهن سبب ٻارن جي غذائي کوٽ ۽ صحت جا مسئلا وڌي رهيا آهن.
آخر ۾ هن برطانوي حڪومت ۽ ايف سي ڊي او جو شڪريو ادا ڪندي چيو ته انهن مختلف شعبن ۾ پاڪستان سان تعاون جاري رکيو آهي، جيڪو سماجي ۽ اقتصادي بهتري لاءِ اهم قدم آهي.
