ڪراچي(اسٽاف رپورٽر) وزيراعظم شهباز شريف ڪراچي جي ڪينٽ اسٽيشن تي اپگريڊ ٿيل شاليمار ايڪسپريس جو افتتاح ڪندي چيو ته پاڪستان ريلوي هاڻ جديد دور ۾ داخل ٿي چڪي آهي، جتي مسافرن لاءِ فرسٽ ڪلاس ۽ اڪانومي ڪلاس جون سهولتون ساراھ جوڳيون بڻايون ويون آهن.
افتتاحي تقريب دوران وزيراعظم جو چوڻ هو ته ڪينٽ اسٽيشن جي تزئين و آرائش شاندار طريقي سان ڪئي وئي آهي، جتي انتظار گاهه، ڊائينگ روم ۽ خودڪار ٽڪيٽ سسٽم جهڙيون جديد سهولتون موجود آهن. هن شاليمار ايڪسپريس کي مڪمل طور نئين ٽرين قرار ڏيندي وزير ريلوي حنيف عباسي کي دل جي گهراين سان مبارڪباد ڏني.
شهباز شريف چيو ته ڪراچي جو ريلوي نظام پراڻو ٿي چڪو هو، پر هاڻ ان جي بحالي سان شهر جي روشني ٻيهر واپس آندي پئي وڃي. هن زور ڏنو ته وسط ايشيا تائين ريلوي روٽ بحال ڪرڻ سان ملڪ جي معيشت کي نئون رخ ملي سگهي ٿو.
وزيراعظم جو وڌيڪ چوڻ هو ته پاڪستان ريلوي صوبن سان شراڪتداري وسيلي ترقي جي راهه تي گامزن آهي، ۽ بلوچستان، خيبرپختونخوا سميت سمورن علائقن ۾ پارٽنرشپ جو دائرو وڌايو ويندو. فريٽ سسٽم کي به منظم ڪرڻ لاءِ قدم کنيا پيا وڃن.
وزيراعظم خاص طور تي ڪراچي سرڪلر ريلوي لائن جي اهميت تي زور ڏيندي چيو ته هي منصوبو شهر واسين لاءِ انتهائي ضروري آهي، ۽ ملڪ جي ٻين اسٽيشنن تي به جديد سهولتون مهيا ڪيون پيون وڃن.
وزير ريلوي حنيف عباسي
حنيف عباسي چيو ته ڪينٽ اسٽيشن جي اپگريڊشن مختصر وقت ۾ مڪمل ڪئي وئي، جڏهن ته گذريل 8 مهينن دوران ريلوي ۾ اهم سڌارا آندا ويا. هن ٻڌايو ته 150 سالن بعد روهڙي جنڪشن کي به اپگريڊ ڪرڻ جو منصوبو تيار آهي، ۽ ملازمن جي حقن جي تحفظ سان آؤٽ سورسنگ جو عمل جاري رهندو.
سنڌ جو وڏو وزير سيد مراد علي شاهه
سنڌ جي وڏي وزير سيد مراد علي شاهه تقريب ۾ شرڪت تي وزيراعظم ۽ وزير ريلوي جو شڪريو ادا ڪندي چيو ته سنڌ حڪومت ريلوي جي ترقي لاءِ وفاق سان مڪمل سهڪار لاءِ تيار آهي. هن ٻڌايو ته ڪراچي واسين لاءِ اليڪٽرڪ بسون آڻڻ سميت ٽرانسپورٽ جي سهولتن ۾ بهتري آندي پئي وڃي.
