ڪولڪتا – ڀارت جي اڳوڻي ڪپتان ۽ ڪرڪيٽ ايسوسيئيشن آف بنگال جي صدر سورو گنگولي انڪشاف ڪيو آهي ته ڪولڪتا ٽيسٽ جي ٽرننگ پچ گوتھم گمڀير جي هدايت تي تيار ڪئي وئي هئي. گنگولي جو چوڻ هو ته پچ ڀلي مثالي نه هئي، پر ڀارت کي 124 رنسن جو ننڍڙو هدف حاصل ڪرڻ گهرجي ها.
گنگولي، ڀارت ٽوڊي سان ڳالهائيندي چيو:
- “گمڀير پاڻ پچ جي نوعيت بابت ڪوريٽر کي هدايتون ڏنيون هيون”
- “پچ بهتر نه هئي، پر ٽيم کي بنيادي صلاحيتن تي ڀروسو ڪرڻ گهرجي”
- “ٽيم جي ڪاميابي متوازن حڪمت عملي ۽ صحيح فيصلن تي دارومدار رکي ٿي”
سورو گنگولي گمڀير جي ڪوچنگ دور جي شروعاتي ڪاميابين جي واکاڻ ڪندي چيو ته هو گمڀير تي اعتماد رکي ٿو، پر ساڳي وقت محمد شامي، جسپريت بمراه، ۽ محمد سراج جهڙن تجربه ڪار فاسٽ بالرن تي ڀروسو ڪرڻ جي ضرورت آهي، جيڪي ميچ جو رخ بدلائڻ جي صلاحيت رکن ٿا.
گنگولي جو بيان پچ جي معيار تي جاري بحث کي نئون رخ ڏئي ڇڏيو آهي، جتي ٽيم جي چونڊ، حڪمت عملي ۽ وڪيٽن جي معيار تي سوال اٿاريا پيا وڃن.
