اسلام آباد (ويب ڊيسڪ) ڪابينه جي اقتصادي رابطا ڪميٽي جي اجلاس ۾ وفاقي سول آرمڊ فورسز جي دفاعي اوزارن جي مرمت، وڌيڪ فنڊز جي فراهمي ۽ دفاعي خدمتن جي منصوبن لاءِ سپليمنٽري گرانٽ جي منظوري ڏني وئي۔
ناڻي واري وزير اورنگزيب جي صدارت هيٺ ٿيل اجلاس ۾ سول آرمڊ فورسز جي دفاعي اوزارن جي مرمت لاءِ 10 ڪروڙ 3 لک رپيا منظور ڪيا ويا۔ ان سان گڏ سول آرمڊ فورسز کي وڌيڪ 84 ڪروڙ 15 لک 60 هزار رپيا ڏيڻ جي به منظوري ملي۔
ناڻي واري وزارت جي جاري ڪيل پڌرائي موجب اجلاس ۾ دفاعي خدمتن جي منصوبن لاءِ 50 ارب رپين جي ٽيڪنيڪل سپليمنٽري گرانٽ منظور ڪئي وئي۔ ان سان گڏ پاسڪو کي ختم ڪرڻ ۽ ان جي جاءِ تي نئون ادارو قائم ڪرڻ جي منظوري به ڏني وئي۔
اجلاس ۾ ايس پي وي جو ابتدائي ادا ڪيل سرمايو 10 لک رپيا مقرر ڪيو ويو، جڏهن ته پيٽروليم ڊويزن جي سمري تحت آف شور آئل ۽ گيس بلاڪس جي لائسنس مدت ۾ واڌ ۽ ورڪنگ انٽرسٽ جي منظوري ڏني وئي۔
غير ملڪي ڪمپنين جي سيڙپڪاري وڌائڻ لاءِ نيون مراعاتي تجويزون به منظور ڪيون ويون۔ ناڻي واري وزارت موجب فنڊز ٽيڪنيڪل سپليمنٽري گرانٽ طور منظور ڪيا ويا، جيڪي داخلي سلامتي، بارڊر ڪنٽرول ۽ امن و امان لاءِ استعمال ڪيا ويندا۔
