ملڪ ۾ ننڍيون چونڊون، ن ليگ قومي اسيمبلي جون ٻه ۽ پنجاب اسيمبلي جي هڪ سيٽ کٽي وئي

اسلام آباد: ملڪ ڀر ۾ قومي اسيمبلي جي 6 ۽ پنجاب اسيمبلي جي 7 حلقن ۾ ننڍي چونڊن جا غير حتمي، غير سرڪاري نتيجا جاري آهن. مسلم ليگ (ن) قومي اسيمبلي جي ٻن حلقن اين اي 129 ۽ اين اي 143 سان گڏ پنجاب اسيمبلي جي هڪ نشست پي پي 203 تي ڪاميابي حاصل ڪئي آهي.
هري پور، لاهور، فيصل آباد، ساهيوال، ڊيره غازي خان، سرگودها، ميانوالي ۽ مظفرگڙھ جي 13 حلقن ۾ پولنگ ٿي، جتي مختلف اميدوارن وچ ۾ سخت مقابلا ڏٺا ويا. انتظاميه موجب 2,792 پولنگ اسٽيشن قائم ڪيا ويا، جن مان 408 انتهائي حساس قرار ڏنا ويا، جڏهن ته امن و امان لاءِ 20 هزار کان وڌيڪ سيڪيورٽي اهلڪار مقرر ڪيا ويا.

 اين اي 185، ڊيره غازي خان

ڊيره غازي خان ۾ ن ليگ جو محمود قادر لغاري اڳتي، پيپلزپارٽي پوئتي

ڊيره غازي خان جي حلقه اين اي 185 ۾ ضمني چونڊ جا غير حتمي، غير سرڪاري نتيجا سامهون اچي ويا آهن. 108 پولنگ اسٽيشنز مان حاصل ٿيل نتيجن مطابق مسلم ليگ ن جو اميدوار محمود قادر لغاري 40,527 ووٽ حاصل ڪري اڳتي آهي، جڏهن ته پيپلزپارٽي جو اميدوار سردار دوست محمد کوسه 19,008 ووٽن سان ٻئي نمبر تي آهي. هن نشست تي سخت مقابلو متوقع هو، جيڪو پي ٽي آءِ جي اڳوڻي ايم اين اي زرتاج گل جي نااهلي کانپوءِ خالي ٿيو هو.

 اين اي 143، ساهيوال

ساهيوال ۾ چوڌري محمد طفيل جٽ ڪامياب، آزاد اميدوار پوئتي

ساهيوال جي حلقه اين اي 143 ۾ سڀني 442 پولنگ اسٽيشنز جا نتيجا اچي ويا آهن. مسلم ليگ ن جو اميدوار چوڌري محمد طفيل جٽ 136,313 ووٽ حاصل ڪري واضح برتري حاصل ڪئي آهي، جڏهن ته آزاد اميدوار ضرار اڪبر 13,120 ووٽن سان ٻئي نمبر تي رهيو. هن نشست تي ووٽرن جو جوش ڏسڻ وٽان هو، جڏهن ته مجموعي طور تي ٽرن آئوٽ معتدل رهيو.

اين اي 18، هري پور

هري پور ۾ بابر نواز اڳتي، آزاد اميدوار شهرناز پوئتي

هري پور جي حلقه اين اي 18 ۾ 161 پولنگ اسٽيشنز جا نتيجا سامهون آيا آهن. مسلم ليگ ن جو بابر نواز 44,707 ووٽ حاصل ڪري پهرين نمبر تي آهي، جڏهن ته آزاد اميدوار شهرناز 28,469 ووٽن سان ٻئي نمبر تي آهي. هن نشست تي مقابلو سخت هو، جيڪو پي ٽي آءِ جي اڳوڻي ايم اين اي عمر ايوب جي نااهلي کانپوءِ خالي ٿيو هو.

 اين اي 129، لاهور

لاهور ۾ حافظ نعمان ڪامياب، پي ٽي آءِ جي حمايت يافته آزاد اميدوار پوئتي

لاهور جي حلقه اين اي 129 ۾ مسلم ليگ ن جو حافظ نعمان 63,441 ووٽ حاصل ڪري ڪاميابي ماڻي آهي. پي ٽي آءِ جي حمايت يافته آزاد اميدوار 29,099 ووٽن سان پوئتي رهيو. لاهور ۾ پولنگ دوران سخت سيڪيورٽي انتظام ڪيا ويا هئا، جڏهن ته ووٽرن جو جوش ۽ شوق نمايان هو.

 اين اي 96، فيصل آبادفيصل آباد ۾ بلال چوڌري اڳتي، آزاد اميدوار نواب شير وسير پوئتي

فيصل آباد جي حلقه اين اي 96 ۾ 153 پولنگ اسٽيشنز جا نتيجا سامهون آيا آهن. مسلم ليگ ن جو بلال چوڌري 63,957 ووٽ حاصل ڪري پهرين نمبر تي آهي، جڏهن ته آزاد اميدوار نواب شير وسير 21,067 ووٽن سان ٻئي نمبر تي آهي. هي نشست پي ٽي آءِ جي اڳوڻي ايم اين اي راءِ حيدر علي کھرل جي نااهلي کانپوءِ خالي ٿي هئي.

 پي پي 203، ساهيوال

ساهيوال ۾ صوبائي نشست تي ن ليگ جي ڪاميابي، ٽرن آئوٽ 23 سيڪڙو

ساهيوال جي صوبائي حلقه پي پي 203 ۾ سڀني 185 پولنگ اسٽيشنز جا نتيجا اچي ويا آهن. مسلم ليگ ن جو چوڌري محمد حنيف جٽ 46,820 ووٽ حاصل ڪري ڪاميابي ماڻي آهي، جڏهن ته آزاد اميدوار فلڪ شير ڊوگر 10,975 ووٽن سان ٻئي نمبر تي رهيو. هن حلقه ۾ ٽرن آئوٽ صرف 23 سيڪڙو رهيو، جيڪو گهٽ دلچسپي جو عڪاس آهي.

 ٻين حلقن جا نتيجا

• پي پي 269 مظفرگڙھ: پيپلزپارٽي جو ميان علمدار قريشي 23,227 ووٽن سان اڳتي.
• پي پي 87 ميانوالي: علي حيدر نور خان 44,944 ووٽن سان اڳتي.
• پي پي 98 فيصل آباد: ن ليگ جو آزاد علي تبسم 28,907 ووٽن سان اڳتي.
• پي پي 115 فيصل آباد: محمد طاهر پرويز 12,431 ووٽن سان اڳتي.
• پي پي 73 سرگودها: سلطان علي رانجھا 28,704 ووٽن سان اڳتي.
• پي پي 116 فيصل آباد: ووٽنگ کانپوءِ نتيجن جي ڳڻپ جاري آهي.