ڪوئٽا: زيارت ضلعي ۾ ليـويز فورس هڪ ڪامياب انٽيليجنس بيسڊ آپريشن ڪندي دهشتگردي جو وڏو منصوبو ناڪام بڻائي ڇڏيو، جنهن دوران 5 شڪي افغان دهشتگردن کي جيئرو گرفتار ڪيو ويو. گرفتار ٿيل دهشتگردن جو تعلق قندھار، افغانستان سان ٻڌايو پيو وڃي.
ليـويز فورس موجب آپريشن سپيرا رغـه چيڪ پوسٽ جي ويجهو ڪيو ويو، جتي دهشتگردن کي گرفتار ڪيو ويو. ضلعي انتظاميه جي هڪ سينيئر آفيسر چيو ته هي آپريشن ليـويز فورس جي انٽيليجنس ۽ فـيلڊ ٽيم جي پيشيوراڻي مهارت جو نتيجو آهي، جنهن ۾ ضلعي انتظاميه جو مڪمل سهڪار شامل ھو.
گرفتار ٿيل دهشتگردن وٽان وڏي مقدار ۾ هٿيار، بارودي مواد ۽ مواصلاتي اوزار هٿ آيا، جن ۾ 11 هينڊ گرينيڊ، 15 ايس ايم جي گرينيڊ، 3 سب مشين گنز، 2 ايم فور رائفلز جا پارٽس، 9 ايم فور ميگزين، 14 ايس ايم جي ميگزين، 420 ايس ايم جي رائونڊ، 230 ايم فور رائونڊ، هڪ ڪلو بارودي مواد، هڪ گرينيڊ لانچر، 2 آر پي جي راڪٽ، 6 وائرليس سيٽ، 4 موبائل فون، هڪ سوزوڪي ڪيري وين، هڪ موٽر سائيڪل ۽ ڪالعدم تنظيم ٽي ٽي پي جو لٽريچر شامل آهي.
وزيراعليٰ بلوچستان مير سرفراز بگٽي ڪامياب آپريشن تي ليـويز فورس ۽ ضلعي انتظاميه کي مبارڪباد ڏني. هن چيو ته ليـويز فورس جهڙيون مقامي فورسون بلوچستان جي امن ۽ استحڪام جي ريڙهه جي هڏي آهن، جن جي قربانين ۽ بروقت قدمن سان دهشتگردن جا ارادا ناڪام ٿي رهيا آهن.
سڪيورٽي ذريعن موجب گرفتار دهشتگردن کان جاچ جاري آهي، جنهن مان وڌيڪ نيٽ ورڪن بابت اهم انڪشافن جو امڪان آھي. هي آپريشن بلوچستان ۾ امن قائم ڪرڻ ڏانهن هڪ اهم قدم قرار ڏنو پيو وڃي.
