اسلام آباد(ويب ڊيسڪ) باني پي ٽي آءِ عمران خان جو ايڪس (اڳوڻي ٽوئٽر) اڪائونٽ بند ڪرڻ بابت درخواست تي اهم پيش رفت ٿي آهي، جنهن ۾ اڊياله جيل جي سپرنٽنڊنٽ عدالت ۾ پنهنجو تفصيلي جواب جمع ڪرايو آهي.
جيل انتظاميه موجب باني پي ٽي آءِ جو ايڪس اڪائونٽ جيل مان هلائڻ جو تاثر مڪمل طور تي غلط آهي ۽ ان حوالي سان ڪيل اڳڪٿيون بي بنياد آهن۔ سپرنٽنڊنٽ اڊياله جيل پنهنجي جواب ۾ واضح ڪيو ته عمران خان سخت نگراني هيٺ آهن ۽ انهن وٽ موبائل فون سميت ڪنهن به شڪي شيءِ رکڻ جو سوال ئي پيدا نٿو ٿئي.
اسلام آباد هاءِ ڪورٽ ۾ جمع ڪرايل جواب ۾ وڌيڪ چيو ويو آهي ته جيل رولز تحت موبائل سميت ڪا به منع ٿيل شيءِ جي اجازت طلب ناهي، جڏهن ته اڊياله جيل جي اندر موبائل فون سگنلز جيمر لڳايل آهن، جنهن سبب جيل جي اندر ۽ ڀرپاسي ۾ موبائل سگنلز مڪمل طور تي بند رهن ٿا.
سپرنٽنڊنٽ وڌيڪ ٻڌايو ته عمران خان ۽ انهن تي مقرر ٿيل اسٽاف کي مستقل طور تي چيڪ ڪيو ويندو آهي، تنهنڪري ڪنهن به منع ٿيل سهولت تائين رسائي ممڪن ناهي. جيل رول 265 تحت عمران خان کي سياسي ڳالهه ٻولهه کان به روڪيو ويو آهي، البت جيل ٽرائل دوران ڪڏهن ڪڏهن خاندان ۽ وڪيل قانون جي ڀڃڪڙي ڪندي سياسي بحث ۾ مشغول ٿي وڃن ٿا۔
سپرنٽنڊنٽ جيل موقف اختيار ڪيو ته ماضي ۾ عمران خان طرفان جيل مان ڏنل سياسي هدايتن ڪيترن ئي موقعن تي معاشري ۾ تشدد کي هوا ڏني، پر سندن ايڪس اڪائونٽ جيل جي اندر کان آپريٽ نٿو ٿئي.
