اسلام آباد(ويب ڊيسڪ) وفاقي آئيني عدالت گٽڪا ايڪٽ خلاف داخل ڪيل درخواست خارج ڪري ڇڏي۔ جسٽس حسن رضوي جي سربراهي ۾ ٻه رڪني بينچ ٻڌڻي ڪئي، جنهن دوران عدالت گٽڪا جي خطرناڪ اثرن بابت سخت ريمارڪس ڏنا۔
جسٽس حسن رضوي چيو ته گٽڪا انساني صحت لاءِ انتهائي خطرناڪ آهي، اهو سڙي ويل سوپارين مان تيار ڪيو ويندو آهي ۽ سگريٽ کان به وڌيڪ نقصانڪار آهي۔ هن وڌيڪ چيو ته گٽڪا وات جي ڪينسر جو وڏو سبب آهي ۽ اسپتالن ۾ اهڙن مريضن جو تعداد عام ٿي ويو آهي۔
ٻڌڻي دوران وڪيل شاهه خاور چيو ته کيس اپيل تي موڪل کان ڪا هدايت ناهي، جنهن تي جسٽس حسن رضوي ريمارڪس ڏنا ته جيڪڏهن چاهيو ته موڪل کي عدالت ۾ گهرايو وڃي ۽ کيس گٽڪو عدالتي ڪمري ۾ کولرائڻو پوندو۔
آخر ۾ آئيني عدالت گٽڪا ايڪٽ خلاف اپيل کي رد ڪري ڇڏيو۔
