پشاور(ويب ڊيسڪ) آءِ جي خيبرپختونخوا پوليس ذوالفقار حميد چيو آهي ته ايف سي هيڊڪوارٽر تي ٿيل حملي جا موجودھ شاھديون ظاهر ڪن ٿيون ته دهشتگرد افغان هئا۔
ميڊيا سان ڳالهائيندي آءِ جي ٻڌايو ته گذريل ڏينهن ٽي خودڪش حمله آور آيا هئا، جن کي فوري طور تي ختم ڪيو ويو ۽ حملو ناڪام بڻايو ويو۔ هن چيو ته جاچ لاءِ فنگر پرنٽس نادرا ڏانهن موڪليا ويا آهن ۽ سڄي شهر جون سي سي ٽي وي فوٽيجز حاصل ڪيون پيون وڃن۔
آءِ جي موجب حملي ۾ استعمال ٿيل موٽرسائيڪل پوليس جي تحويل ۾ آهي ۽ ان مان فنگر پرنٽس حاصل ڪيا ويا آهن۔ هن چيو ته هن سال حملن ۾ اضافو ٿيو آهي پر پوليس انهن کي پسپا ڪيو آهي، جڏهن ته مختلف ضلعن کي جديد هٿيار فراهم ڪيا پيا وڃن۔
ذوالفقار حميد ٻڌايو ته دهشتگردن جي حڪمت عملي ۾ تبديلي آئي آهي، پر پوليس جو ردعمل عملي طور تي سڀني ڏٺو۔ هن چيو ته پوليس کي اينٽي ڊرون سميت جديد ٽيڪنالاجي فراهم ڪئي پئي وڃي ۽ ٿانن کان وٺي اعليٰ سطح تائين بلٽ پروف گاڏين جي فراهمي تي ڪم ٿي رهيو آهي۔
واقعي بابت وڌيڪ تفصيل ڏيندي آءِ جي چيو ته جاچ ڪئي پئي وڃي ته دهشتگرد ڪهڙي رستي سان پشاور ۾ داخل ٿيا ۽ جتي رات گذاري، ان جي سڃاڻپ ٿي وئي آهي، البت سهولتڪارن جي گرفتاري اڃا تائين نه ٿي آهي۔
