اسلام آباد(ويب ڊيسڪ) پرڏيهي آفيس هفتيوار پريس بريفنگ ۾ چيو آهي ته امريڪا ۾ فائرنگ جو واقعو عالمي سطح تي دهشتگردي جي واپسي کي ظاهر ڪري ٿو، جڏهن ته تاجڪستان ۾ ٿيل ڊرون حملي ۾ ٽي چيني شهري مارجي ويا، جنهن جي ذميواري افغان حڪومت تي لاڳو ٿئي ٿي. ترجمان چيو ته افغانستان کي گهرجي ته پنهنجي سرزمين تان دهشتگردي روڪڻ لاءِ فوري قدم کڻي.
ترجمان وڌيڪ چيو ته واشنگٽن ۾ فائرنگ جو افسوسناڪ واقعو پاڪستان سختي سان مذمت ڪري ٿو ۽ فوتين جي وارثن سان دلي همدردي جو اظهار ڪري ٿو. عالمي برادري کي افغان دهشتگردي روڪڻ لاءِ گڏيل حڪمت عملي اختيار ڪرڻي پوندي.
تاجڪستان ۾ چيني شهري مارجي وڃڻ تي به پاڪستان افسوس جو اظهار ڪيو ۽ چيو ته افغانستان کي ذميواري نڀائي دهشتگردي جي روڪٿام ڪرڻي آهي.
ترجمان دفتر خارجہ سنڌ بابت ڀارتي وزير دفاع راج ناتھ جي بيان کي به سختي سان رد ڪيو ۽ چيو ته اهو بيان سرحدي عالمي قانونن جي کليل ڀڃڪڙي آهي. پاڪستان پرامن حل جو حامي آهي پر پنهنجي دفاع تي ڪڏهن به سمجهوتو نه ڪندو.
