گوہاٽي (آسام): ڀارتي رياست آسام جي اسيمبلي هڪ متنازع قانون منظور ڪيو آهي، جنهن تحت هڪ کان وڌيڪ شادي (پوليگمي) کي جرم قرار ڏنو ويو آهي۔ عالمي خبرن موجب، هن قانون جي منظوري کان پوءِ ٻي شادي ڪرڻ تي سخت سزائون لاڳو ٿينديون۔
پهرين شادي جي موجودگي ۾ ٻي شادي ڪرڻ تي 7 سال قيد ٿي سگهي ٿي، ۽ جيڪڏهن پهرين زال جي اجازت نه ورتي وئي ته سزا ۾ اضافو ٿيندو۔
پهرين شادي کي لڪائي ٻي شادي ڪرڻ تي 10 سال قيد ۽ بار بار اهو عمل ڪرڻ تي سزا ٻيڻي ٿي ويندي۔
ٻي شادي ڪندڙ يا ڪرائيندڙ کي سرڪاري نوڪري ۽ مقامي چونڊن ۾ حصو وٺڻ جي اجازت نه هوندي۔
معاونت ڪندڙ جهڙوڪ ڳوٺ جو سرپنچ، مذهبي اڳواڻ، والدين يا سرپرست کي به 2 سال قيد ۽ هڪ لک کان ڊيڍ لک رپيا جرمانو ٿي سگهي ٿو۔
بل ۾ غير قانوني شادي جي شڪار عورتن لاءِ معاوضي ۽ قانوني تحفظ جي شق به شامل آهي۔
وزيراعليٰ آسام وضاحت ڪئي ته هي قانون اسلام مخالف نه آهي، پر سماج ۾ ازدواجي ذميوارين ۽ عورتن جي حقن جي تحفظ لاءِ ضروري آهي۔ هن مثال ڏني ته ترڪي سميت ڪيترن ئي ملڪن ۾ ٻي شادي تي پابندي آهي۔
تنقيد ڪندڙن موجب، هي قانون ذاتي آزادي ۽ مذهبي روايتن تي پابندي آهي، خاص طور تي انهن ڪميونٽيز ۾ جتي ٻي شادي کي مذهبي يا روايتي طور اجازت حاصل آهي۔ البت مخصوص قبيلن، نسلن ۽ خودمختار علائقن کي جزوي استثنا ڏنو ويو آهي۔
