واشنگٽن(ويب ڊيسڪ) آمريڪا افغان پاسپورٽ تي سفر ڪندڙ سڀني ماڻهن لاءِ ويزا ڏيڻ واري ڪم کي اوچتو روڪي ڇڏيو آهي، جڏهن ته پناهه جي خواهشمندن جون اسائلم درخواستون به عارضي طور معطل ڪيون ويون آهن.
آمريڪي پرڏيهي وزارت جو چوڻ آهي ته هي قدم قومي سلامتي ۽ عوام جي تحفظ کي يقيني بڻائڻ لاءِ کنيو ويو آهي، تنهنڪري اهڙن معاملن کي في الحال مؤخر ڪيو ويو آهي.
پرڏيهي وزارت جي اعلان کان پوءِ يو ايس سٽيزن شپ اينڊ اميگريشن سروسز به حڪم جاري ڪيو آهي ته ڪنهن به غيرملڪي جي اسڪريننگ ۽ سيڪيورٽي جاچ مڪمل ٿيڻ تائين ڪا به درخواست اڳتي نه وڌائي ويندي.
اداري جي ڊائريڪٽر جوزيف ايڊلو واضح ڪيو ته مڪمل تسلي کان سواءِ ڪنهن به شخص جي درخواست تي ڪارروائي نه ٿيندي.
ياد رهي ته گذريل ڏينهن آمريڪي صدر ڊونلڊ ٽرمپ بيان ڏنو هو ته ٽين دنيا جي ملڪن مان هجرت کي مستقل طور روڪڻ جو ارادو آهي ۽ اهڙن ماڻهن جي شهريت به منسوخ ڪئي ويندي جيڪي اندروني امن لاءِ خطرو بڻجي سگهن ٿا.
هي صورتحال ان واقعي کانپوءِ پيدا ٿي آهي، جنهن ۾ وائٽ هائوس جي ويجهو هڪ افغان ڄائي فائرنگ ڪندي نيشنل گارڊز کي نشانو بڻايو، جنهن ۾ هڪ عورت گارڊ مارجي وئي ۽ هڪ سخت زخمي ٿيو.
آمريڪي ميڊيا موجب مبينا حملي آور افغان شهري 2021 ۾ ري سيٽلمنٽ پروگرام تحت آمريڪا آيو هو. ان واقعي کانپوءِ آمريڪي ادارن اميگريشن بابت سخت قدم کڻڻ جو فيصلو ڪيو آهي.
