ڪراچي(ويب ڊيسڪ) گلشن اقبال نِيپا چورنگي وٽ آچر جي رات کليل مين هول ۾ گرندڙ معصوم ٻار اڃا تائين نه ملي سگهيو آهي، جنهن جي ڳولا جاري آهي. انتظاميا جي ڪوتاهي تي شهرين سخت احتجاج احتجاج به ڪيو.
اطلاعن موجب ريسڪيو ٽيم سڄي رات ٻار کي ڳولڻ جي ڪوشش ڪندي رهي، پر مناسب مشينري نه هئڻ سبب آپريشن روڪڻو پيو. بعد ۾ علائقي واسين پنهنجي مدد پاڻ تحت هيَوي مشينري گهرائي کوٽائي شروع ڪئي.
مين هول ۾ ڪرندڙ 3 سالن جو ابراهيم ولد نَبيل پنهنجي والدين سان گڏ ويجهو ڊپارٽمينٽل اسٽور ۾ خريداري لاءِ آيو هو. ٻاهر نڪرندي ئي هٿ ڇڏائي ڀڄي ويو ۽ بغير ڍَڪَ واري گٽر ۾ ڪري پيو. والد ٻڌايو ته هو موٽر سائيڪل پارڪ ڪري رهيو هو ته اوچتو ابراهيم پوئتي اچي مين هول ۾ ڪري پيو. ڏاڏي چيو ته ابراهيم والدين جو اڪيلو پُٽ هو، جيڪو انتظاميا جي ڪوتاهي جو شڪار ٿيو.
افسوسناڪ واقعي کان پوءِ ماءُ صدمو برداشت نه ڪري سگهي، جڏهن ته علائقي ۾ ڏک ۽ ڪاوڙ پکڙيل آهي. شهرين نِيپا چورنگي تي ٽائر ساڙي روڊ بلاڪ ڪري ڇڏيو، حسن اسڪوائر ۽ ڪراچي يونيورسٽي ويندڙ رستا به بند ڪيا ويا. احتجاج دوران هڪ ميڊيا وين تي به پٿر اڇلايا ويا.
ٻئي طرف سنڌ حڪومت واقعي جو نوٽيس وٺي جاچ شروع ڪري ڇڏي آهي. ترجمان سعديه جاويد موجب مين هول تي ڍَڪ ڇو نه هو، ان جي جاچ ڪئي پئي وڃي ۽ ذميوارن خلاف سخت ڪارروائي ڪئي ويندي.
