لاهور (ويب ڊيسڪ) وفاقي گهرو وزير محسن نقوي چيو آهي ته اظهارِ راءِ جي آزادي جو مطلب ڪوڙو خبرون پکيڙڻ نه آهي ۽ هاڻي فيڪ نيوز خلاف سڄي ملڪ ۾ سطح تي سخت ڪريڪ ڊائون شروع ڪيو ويندو.
وفاقي گهرو وزير لاهور ۾ ميڊيا سان ڳالهائيندي چيو ته سوشل ميڊيا تي لڳ ڀڳ 90 سيڪڙو خبرون ڪوڙيون هونديون آهن، جيڪي عوام کي گمراهه ڪرڻ جو سبب بڻجن ٿيون. هن واضح ڪيو ته قومي سلامتي ۽ سماجي امن تي ڪو به سمجھوتو نه ڪيو ويندو، ۽ غلط اطلاعن کي روڪڻ لاءِ سخت قدم کنيا ويندا.
محسن نقوي وڌيڪ چيو ته ملڪ ۾ غير قانوني طور رهندڙ افغان شهري هر صورت واپس موڪليا ويندا. هن چيو ته افغان باشندن کي عزت سان پنهنجي وطن واپس وڃڻ گهرجي، ڇو ته هاڻي اهي پاڪستان جا مهمان نه رهيا. وفاقي گهرو وزير ٻڌايو ته تازن دهشتگرد حملن ۾ ملوث ڪيترائي افغان شهري شامل هئا، جن ۾ اسلام آباد ڪچهري حملو ڪندڙ ۽ ايف سي تي حملو ڪندڙ شامل آهن.
هن خبردار ڪيو ته جيڪي افغان واپس وڃڻ بعد ٻيهر پاڪستان آيا، انهن کي گرفتار ڪري قانون مطابق سزا ڏني ويندي. نقوي چيو ته خيبر پختونخوا ۾ افغان ڪيمپ ختم ڪرڻ جو عمل شروع ٿي ويو آهي ۽ ملڪ جي مختلف صوبن ۾ به ڪارروائي جاري آهي.
وفاقي گهرو وزير چيو ته قومي سلامتي جي معاملي ۾ ڪنهن به صوبو پنهنجي مرضي جي پاليسي نه اپنائي سگهي. هن چيو ته ملڪ گير حڪمتِ عملي تي عمل لازمي آهي ۽ ڪنهن کي به ان کان ڦرڻ جي اجازت نه ڏني ويندي.
محسن نقوي سوشل ميڊيا تي ماڻهن جي تذليل بابت به خبردار ڪيو ۽ چيو ته ڪنهن کي به عزت نفس مجروح ڪرڻ جي اجازت نه ڏني ويندي. هن وڌيڪ چيو ته پرڏيهه ۾ ويٺل ماڻهو به جلد واپس آندا ويندا ته جيئن پنهنجي بيانن جو جواب ڏئي سگهن.
