رسالپور: سربراهه پاڪ فضائيه ايئر چيـف مارشل ظهير احمد بابر سدھو چيو آهي ته جيڪڏهن پاڪستان جي قومي خودمختياري کي ٻيهر چيلينج ڪيو ويو، ته دشمن پاڪ فضائيه کي اڳ کان وڌيڪ مضبوط ۽ تيار پائيندو.
هن ڳالهه جو اظهار هن پي اي ايف اڪيڊمي اصغر خان رسالپور ۾ پاسنگ آئوٽ پريڊ جي تقريب ۾ مهمانِ خصوصي جي حيثيت سان خطاب ڪندي ڪيو. ايئر چيـف چيو ته سعودي ڪيڊٽس جي موجودگي ٻنهي ملڪن ۽ سندن مسلح فوجن جي مضبوط دوستي ۽ تعاون جي علامت آهي.
هن زور ڏنو ته پاڪ فوج ۽ قوم اتحاد جي شاندار مثال پيش ڪندي دشمن کي عددي برتري جي باوجود شڪست ڏني. معرڪه حق ۾ حاصل ڪيل ڪاميابي قومي طاقت جي گڏيل ڪردار ۽ الله تعاليٰ جي خاص رحمتن جو نتيجو هئي. هن چيو ته پاڪ فضائيه گهٽ تعداد ۾ به دشمن جا جديد جهاز مار گرائڻ جي روايت برقرار رکي، جنهن سان عزت سان امن قائم ڪرڻ جو مقصد حاصل ٿيو.
ايئر چيـف مارشل ظهير احمد بابر سدھو چيو ته دنيا اڳ ڪڏهن به هوائي طاقت جو اهڙو جرئتمنداڻو استعمال نه ڏٺو هو، جيڪو جديد ٽيڪنالوجيز سان مربوط هو. 2025ع ۾ پاڪ فضائيه پنهنجي پيشيوراڻي مهارت ۽ سڀني شعبن ۾ برتري ثابت ڪئي.
هن ٻڌايو ته پاڪ فضائيه جارحانه ۽ تخليقي حڪمت عملي اختيار ڪندي جديد جهازن ۽ ٽيڪنالوجيز کي رڪارڊ وقت ۾ شامل ڪيو. هن هر فرد جي محنت ۽ بهادري کي خراجِ تحسين پيش ڪيو ۽ چيو ته قوم پاڪ فضائيه جي همت ۽ جرئت تي فخر ڪري ٿي.
ايئر چيـف جو چوڻ هو ته پاڪستان هڪ پرامن ملڪ آهي ۽ سڀني سان دوستانه تعلقات قائم رکڻ چاهي ٿو، پر جيڪڏهن قومي خودمختياري کي ٻيهر چيلينج ڪيو ويو، ته دشمن کي وڌيڪ مضبوط ۽ بهتر تيار پاڪ فضائيه جو سامنا ڪرڻو پوندو.
تقريب ۾ پاڪ فضائيه جا جنگي جهاز ۽ شير دل ايئروبيٽڪس ٽيم فلاءِ پاسٽ جو مظاهرو ڪيو. اڄ جي پاسنگ آئوٽ ۾ مجموعي طور 166 ڪيڊٽس فارغ التحصيل ٿيا، جن ۾ 136 پاڪ فضائيه جا ۽ 20 سعودي فضائيه جا ڪيڊٽس شامل هئا.
