اسلام آباد(ويب ڊيسڪ) ملڪ ۾ پيٽرول ۽ ڊيزل جي قيمتن ۾ شامل ٽيڪسن جي تفصيل سامهون اچي وئي آهي، جنهن مان ظاهر ٿئي ٿو ته عام شهري هر ليٽر ايندھن تي ڳرو ٽيڪس ادا ڪري رهيو آهي.
پيٽروليم ڊويزن جي ذريعن موجب، موجوده قيمت جو لڳ ڀڳ 37 سيڪڙو حصو صرف ٽيڪسن تي مشتمل آهي. هڪ ليٽر پيٽرول ۾ 96 رپيا 28 پيسا ٽيڪس جي صورت ۾ شامل آهن، جن ۾ ڪسٽم ڊيوٽي، پيٽروليم ليـوي ۽ ڪلائميٽ ليـوي شامل آهن.
ساڳي طرح، هڪ ليٽر ڊيزل ۾ به 34 سيڪڙو يعني 94 رپيا 92 پيسا ٽيڪس جي مد ۾ شامل ڪيا وڃن ٿا. ڊيزل تي به ساڳيا ٽيڪس لاڳو ٿين ٿا جيڪي پيٽرول تي لڳن ٿا، ۽ انهن جو سڌو اثر صارفين جي جيب تي پوي ٿو.
