ڪابل/ايران (ويب ڊيسڪ) افغان اختيارين دعويٰ ڪئي آهي ته ايران ۾ غيرقانوني طور داخل ٿيڻ جي ڪوشش ڪندڙ گهٽ ۾ گهٽ 10 افغان شهري ايران جي بارڊر گارڊز جي فائرنگ ۾ مارجي ويا.
غيرملڪي ميڊيا موجب، صوبي فراھ جي سيڪيورٽي ڪمان جو ترجمان محمد نسيم بدري ٻڌايو ته اهي ماڻهو روزگار جي تلاش ۾ ايران وڃي رهيا هئا ۽ سومر جي رات شيخ ابو نصر فراحي بارڊر پوائنٽ ذريعي سرحد پار ڪري رهيا هئا، جتي گارڊز کين گوليون هنيون.
ترجمان موجب سڀئي فوتي صوبي فراھ جا رهواسي هئا، جڏهن ته ساڳئي گروهه جا ٻه ماڻهو اڃا تائين لاپتا آهن. واقعي جي جاچ جاري آهي ۽ ايران طرفان اڃا تائين ڪو به سرڪاري ردعمل سامهون نه آيو آهي. هي واقعو اهڙي وقت پيش آيو آهي، جڏهن ايران ۽ افغانستان جي وچ ۾ سرحدي تڪرار ۽ ڇڪتاڻ ۾ لڳاتار اضافو ٿي رهيو آهي. گذريل هڪ سال دوران ايران ڪيترن ئي افغان مهاجرن کي زبردستي واپس موڪليو آهي، جنهن سان ٻنهي ملڪن جا لاڳاپا وڌيڪ ڇڪتاڻ جو سبب بڻجي ويا آهن.
