ڪراچي(اسٽاف رپورٽر) وزيراعليٰ سنڌ سيد مراد علي شاهه سان سري لنڪا جي قونصل جنرل سنجيوا پٽي والا ملاقات ڪئي، جنهن ۾ ٻنهي ملڪن جي ٻطرفي لاڳاپن، واپار، سيڙپڪاري ۽ باهمي دلچسپي جي معاملن تي تفصيلي خيالن جو ڏي وٺ ڪيو ويو.
ملاقات دوران سياحت جي فروغ تي خاص زور ڏنو ويو. وزيراعليٰ ٻڌايو ته ورلڊ ڪلچر فيسٽيول ۾ سري لنڪا جو 12 رڪني وفد شرڪت ڪئي، جنهن ڪراچي ۾ دنيا جي مختلف ثقافتن کي هڪ هنڌ گڏ ڪري هڪ خوبصورت مثال قائم ڪئي. قونصل جنرل پڻ آگاهي ڏني ته سري لنڪا جو 27 رڪني تجارتي وفد تازو ڪراچي جو دورو ڪري چڪو آهي.
سنجيوا پٽي والا چيو ته سنڌ جو سيمينٽ ۽ تعميراتي برانڊز سري لنڪا ۾ تمام گهڻا مقبول آهن. هن وڌيڪ چيو ته کيس ڪراچي تمام گهڻو پسند آهي. وزيراعليٰ مراد علي شاهه چيو ته سنڌ حڪومت ڪراچي کي عالمي تجارتي مرڪز بڻائڻ لاءِ سرگرم آهي.
ملاقات دوران وزيراعليٰ پنهنجي سري لنڪن دوست جو ذڪر به ڪيو، جيڪو آمريڪا ۾ سندس ساٿي شاگرد هو ۽ بعد ۾ پي ايڇ ڊي مڪمل ڪئي. مراد علي شاهه ٻڌايو ته هو پنهنجي دوست سان ملڻ لاءِ سري لنڪا به ويو هو ۽ سري لنڪا جا ماڻهو نهايت محنتي ۽ بهترين آهن.
وزيراعليٰ چيو ته سري لنڪا پنهنجي محنت سان بحران تي قابو پاتو آهي ۽ سنڌ حڪومت جون نيڪ تمنائون سري لنڪا جي حڪومت ۽ عوام سان گڏ آهن.ملاقات جي آخر ۾ ٻنهي اڳواڻن وچ ۾ ڪرڪيٽ بابت دلچسپ گفتگو پڻ ٿي.
