لاهور(ويب ڊيسڪ) لاهور هاءِ ڪورٽ ۾ پتنگ بازي آرڊيننس 2025 کي ڪالعدم قرار ڏيڻ بابت درخواست جي ٻڌڻي ٿي، جنهن دوران عدالت درخواستگذار کي هدايت ڪئي ته ڊي جي والڊ سٽي کي لازمي طور ڌر بڻايو وڃي، ڇو ته بسنت جي بحالي بابت سفارشون بنيادي طور والڊ سٽي اختيارين طرفان ڏنيون ويون هيون.
ٻڌڻي دوران درخواستگذار ۽ جوڊيشل ايڪٽوازم پينل جي سربراهه اظهر صديقي موقف اختيار ڪيو ته هي انساني جانين جي تحفظ جو اهم معاملو آهي ۽ ان تي جلد ٻڌڻي ٿيڻ گهرجي. عدالت سرڪاري وڪيل جي دير سان پيش ٿيڻ تي ناراضگي جو اظهار ڪيو ۽ چيو ته پنهنجي توانائي بچايو ۽ ڌر بڻائي دليل ڏيو.
جسٽس محمد اويس خالد ڪيس جي ٻڌڻي 10 ڊسمبر تائين ملتوي ڪري ڇڏي.
اظهر صديقي دليل ڏيندي چيو ته حڪومت آرڊيننس ذريعي عوامي جان و مال کي خطري ۾ وجهي رهي آهي، جڏهن ته ماضي ۾ ڌاتي ۽ ڪيميڪل ڊور سبب ڪيترائي جاني نقصان ٿي چڪا آهن. 2001 ۽ 2024 جي قانونسازي باوجود فوتگيون نه رڪيون، تنهن ڪري نئون ريگوليٽري آرڊيننس به عوامي مفاد جي خلاف آهي ۽ وڌيڪ نقصان جو سبب بڻجي سگهي ٿو.
درخواست ۾ مطالبو ڪيو ويو آهي ته فوتين جا انگ اکر، ايف آءِ آرز ۽ لاڳو بابت تفصيل سامهون آندا وڃن، ۽ جيڪڏهن پتنگ بازي بحال ڪئي وئي ته هر جاني نقصان جي ذميواري حڪومت تي هوندي. درخواستگذار عدالت کان ترميمي آرڊيننس واپس وٺڻ جا حڪم جاري ڪرڻ جي استدعا ڪئي آهي.
