ممبئي (شوبز نيوز) ڀارتي ٽي وي انڊسٽري جي مشهور اداڪاره ساره خان پنهنجي دوست ڪرش پاٺڪ سان ٻي شادي ڪري ورتي، جنهن جون دلڪش تصويرون سوشل ميڊيا تي تيزي سان وائرل ٿي رهيون آهن. ڀارتي ميڊيا موجب ٻنهي جي ڪورٽ شادي گذريل آڪٽوبر ۾ ٿي هئي، جڏهن ته دسمبر ۾ باقاعده شادي جون رسمون ادا ڪيون ويون، جن ۾ شاندار فوٽو شوٽ پڻ ڪيو ويو.
نئين گهوٽ ڪنوار پنهنجي شادي جون تصويرون سوشل ميڊيا تي شيئر ڪيون، جتي مداحن طرفان انهن کي وڏي پيماني تي پسند ڪيو پيو وڃي. ساره ۽ ڪرش شادي جي تقريبن ۾ هندو رسمن سان گڏ نڪاح جي تقريب به منعقد ڪئي. هندو رسمن لاءِ ٻنهي ڳاڙهي روايتي لباس جي چونڊ ڪئي، جڏهن ته نڪاح جي تقريب ۾ اڇي چمڪدار پوشاڪ انهن جي جوڙي کي وڌيڪ خوبصورت بڻائي ڇڏيو.
جوڙي تصويرن سان گڏ پنهنجا جذبات به ظاهر ڪيا ۽ لکيو: قبول آهي کان ست ڦيرن تائين، اسان جي محبت پنهنجي ڪهاڻي پاڻ لکي ۽ ٻنهي جهانن هائو ڪري ڇڏي.
ساره خان شادي کان پوءِ ريسپشن جون تصويرون به جاري ڪيون، جن ۾ هوءَ پنهنجي ويجهن دوستن سان خوشگوار موڊ ۾ نظر اچي رهي آهي.
واضح رهي ته ساره خان جي اها ٻي شادي آهي. ان کان اڳ هوءَ اداڪار علي مرچنٽ سان شادي شده هئي، پر هڪ سال بعد ئي ٻنهي جي وچ ۾ طلاق ٿي وئي هئي۔
